Luuka 6:2-32

²Mafwarizeewu khusala awoozela yoori: “Mwaasa aya niini mwirettaka vitthu ziiyiye mwiikho orettiwa saapatu?”

³Ye khuwaajipu araka: “Khamwinasome etthu aarettiyeeyo Daawuuda wakathi yankholiyeevo jala na ashirikha awe?

⁴Ye aaviriye Nnyupa wa Nnyizinku khuthuula phaawu zoohalaalishiwa khurafuna kiina khuwenkha ashirikhaawe, ila alupa aarina ruhusa yoorafuna aari mahaakhimu a tiini paasi.”

⁵Yinsa khulupa araka: “Mwaana wa pinaatamu ti Mbwana mwennyewe saapatu.”

⁶Saapatu kiina, Yinsa khuvira nnyupa woosifwiwamo Nnyizinku khusala awaanozela, aarimo mwinyi mmote waarakaliyeeyo nkhono nlume.

⁷Anamanozela a kano na mafwarizeewu eetta omweekesela yoori amoone Yinsa nkhama aari onvonisa siikhu ya saapatu, yoori ankwisele paathuli.

⁸Ila ye aari ojuwa etthu aari wuupuwelaaye atthu apale. Khumuuza mwinyi otule woorakala nkhono nlume yoori: “Olankhe ote vakatthi apha.” Mwinyi khulankha khweemela.

⁹Aphano Yinsa khuwoozela yoori: “Ensuhaaye orettiwa saapatu ti tiivi? Yooshapweya ama yootakhala, wuusuru ama wuula?”

¹⁰Khuweekesa atthu ooshi apale aariivo khumuuza mwinyi otule yoori: “Wookole nkhono awo.” Ye khookola, khuvona.

¹¹Anamanozela a kano na mafwarizeewu khwiiphiiriwa khusala awaza etthu yonrettela Yinsa.

¹²Siikhu zaya epile Yinsa khulankha khusala alawa omwaako olompa, khwiisha osikhu wooshi eettaka olompa.

¹³N'oocha khuwaakhuwela anakhiyoni awe khuwaathawula khumi na awiri, atthaapo theenya khuwenkha nzina la owaaswihaapa.

¹⁴Simawu antthajiye nzina la Pheeturu, Antere ttwiiye Simawu, Yaakhumpa, Yaahaya, Filiipe, Paturumeewu.

¹⁵Mateewuzhu, Tome, Yaakhumpa mwaana wa Alufayo na Simawu aniitthiwaaye Zelooti,

¹⁶Yuuda mwaana wa Yaakhumpa, na Yuuda Iskariyooti otule aari weettelaaye onkholisa Yinsa.

¹⁷Yinsa khwiishukha vamwaako na maaswihaapa awe khweemela nshini wa mwaakho vahali aariivo anakhiyoni awe na khuntti ya atthu a Yudeya yooshi na a Yeruzaleemu, mpakha apale a miti za waattamela pahari, Tiiro na Sitooni.

¹⁸Apale aateeliyeeyo osiila na ovonisiwa moolwele aya, mpakha na apale aari wantipwiwaaye ti masheethwani aari ovonisiwa.

¹⁹Atthu ooshi aari otakha onsapa Yinsa mwaasa yoori waari onsaruwa owahi khusala owaavonisa ooshi.

²⁰Aphano Yinsa khulansa maasho khuweekesa anakhiyoni awe khuwooza yoori: “Ananshapweyiwa ti mweyo mwiiyiye asikhini, maana Ofwalume wa Nnyizinku pu weenu.

²¹Ananshapweyiwa ti mweyo enuukholaanini jala aphano, maana mwinlawa mwarupale. Ananshapweyiwa ti mweyo mwinlilaaye aphano, maana mwinteela otheya.

²²Ananshapweyiwa ti mweyo, mmana atthu eephiiriwaka ti mweyo, awiikarani, oottukhanani na khuwoonani ohifwayi mwaasa wonlotta Mwaana wa Pinaatamu.

²³Wakathi aya otthuupo, mwiiye woofurahi na mwitthape, maana tthuvo yenu eniiya khuluyeene pinkuuni. Maana wa nanna etthiipi, apapa zaya na-yo aawaaretteliye manapiyu.

²⁴Ila olaanikha pu weenu mweeyo mwaamathaajiri, maana mwapokhera tthuvo yenu vathi attaapha.

²⁵Olaanikha pu weenu mweeyo ziwiitaaleliyeenini vitthu-zoojiwa, maana mwinteela okholiwa ti jala. Olaanikha pu weenu mweeyo mwiriina furaha eleelo eti, maana mwinteela ojikhupanyera na olila.

²⁶Olaanikha pu weenu mweeyo mmana mwittottopeliwaka pi atthu ooshi, maana apapa zaya aawaaretteliye etthiipo manapiyu oojipanka.

²⁷Nakataalikha mweeyo mwinikisiilaaye, kiniwuuzani yoori mwiwaaphete maatuwi enu, mwiwaarettele saana apale aniiphiiriwaaye ti mweyo.

²⁸Mwiwaaparikhiye apale anuulaanaanini na mwiwaalompele apale anuurettelaanini zootakhala.

²⁹Nkhama ntthu oopwakula nlaku limote, na ntthi likina ontheteezele. Nkhama ntthu oovula juupa yawo, ohinkhattaze othuula hempe yawo.

³⁰Omwinkhe wakhula otule anuuvekelaaye, nkhama ntthu athuula etile yiiyiye yaawo, ohinkhanyarele wuurutisela.

³¹Epile mweeyo zinuutuvelaanini oretteliwa pi azeenu, na-mweyo mwiwaarettele azeenu etthiipo.

³²Amana mwiwaaphetaka apale anuuphetaanini paasi, fwayita-ni mwineekeselaaye mmakhono wa Nnyizinku? Hatha anatwampi atthaapo aniwaapheta apale na-yo aniwaaphetaayo.