Luk 6:2-32

²A ramano kum Parisi det iting lena, “Ilai sur mot pam a utna ri, ra ke tokodos elar nama warkurai tagun a Bung na Sabat?”

³O Iesu i balu det lena, “Pepetlai, ka mot luki utmakai asau ra o Dewid i pami? Det nama taro ra det wan tomo det murak,

⁴ra i ruk una rumu anun o God, i los pas a beret ra di sa pitar tari torom o God, i wani, ra i tabor det kai ra det wan tomo nami. A beret ra, a warkurai taguni, i lenri, a kum tene etabor kut torom o God det in nangon taguni, ma a taro oros awu.”

⁵Ma o Iesu i watungi tandet lena, “A Nutun a Musano i a Labino tagun a Bung na Sabat.”

⁶Un ara Bung na Sabat bulung, o Iesu i ruk una rumu na lotu, ma i ususer a taro. Ara musano kura iai, a sot na lamano i kong.

⁷A kum Parisi ma a kum tene ususer tagun a Warkurai det sisio sur tu utna det in takun o Iesu nami. Det tamtama wakak taru ut uni, ra in ulangolango pas a musano ra una Bung na Sabat, o awu.

⁸Ma o Iesu i tasman a nuknukin det ra i watungi tan a musano ra a lamano i kong lena, “Un tur! Ra un nan usa numugu tan a taro rop.” I katutur, ra i tur taru sa numugu tandet.

⁹Ra o Iesu i watungi tandet lena, “An ting mot: Asau i tokodos sur din pami una Bung na Sabat? Din pam a wakakino o a laulau ino? Din ulaun taio, o din ban laulau taio?”

¹⁰Ma i nas pukpukus det rop, ra i inanos a musano lena, “Kodos a lamam.” I kodosi, ra a lamano i tokodos melet.

¹¹Ikut in balandet i sungun, ma det wasiso tomo sur tu ngas na utna det in pami un o Iesu.

¹²Ara bung, o Iesu i wan usapat una tangai sur in wararing. A bung na mirum rop ra, i wararing torom o God.

¹³Ra i sa waspi, i kabo pas anun a taro na ususer toromi, ma i pilok pasi kut a noino ma aru tagun det, ra i urising det a kum aposel.

¹⁴Iri a kum risandet: O Saimon, i ra o Iesu i urisingi nam o Pita, dersino nam o Endru, o Jems, o Jon, o Pilip, o Batolomiu,

¹⁵o Matiu, o Tomas, o Jems a nutun o Alpius, o Saimon ara tagun a kum Silot,

¹⁶o Judas a nutun o Jems, ma o Judas Iskariot i ra i usobor tar o Iesu.

¹⁷Ra o Iesu tomo nama nun a taro na ususer det wan pirso tagisapat una tangai, i tur una elaro na nubual, tomo nam anun a kunur na taro na ususer. Ma a labino kunur na taro tagitong una papor Judia ma tagisapat o Jerusalem ma tagun a kum tamon nago korot utasi milau o Tair ma o Saidon kai,

¹⁸det wanpat sur det in longoro i, ma sur in ulangolango pas det gusun anundet a kum misait. Ma i lakro ru a kum laulau na nion gusun det rop ra a kum laulau na nion det ban laulau det.

¹⁹Ra a taro rop, det nemi sur det in pam a pinin o Iesu, uni a dekdek i pirso gusuni, ma i ulangolango pas det rop.

²⁰O Iesu i tama anun a taro na ususer ra i watungi lena, “Mot ra mot sibo, mot dan, uni a matanitu anun o God, anumot!

²¹Mot ra uniri mot murak, mot dan, uni numur mot in masur. Mot ra uniri mot tangis, mot dan, uni numur mot in nongon.

²²Mot dan ra a taro det nget mot, o det pilok ru mot ma det watung laulau mot, ma det ban laulau a risamot, uni mot tagun a Nutun a Musano.

²³“Una bung ra din pam a kum utna ri torom mot, mot in gas, mot in sirsirok nama gasgas, uni i labo sakit anumot a ikul sapat una langit. Uni a kum utna ri, a kum tumtubun det tagun numugu det sa pam tari torom a kum poropet.

²⁴“Ikut in laulau torom mot a kum tene gongon, uni mot sa rakon pas anumot a wakakino.

²⁵In laulau torom mot ra uniri mot masur, uni numur mot in murak. In laulau torom mot ra uniri mot nongon, uni numur mot in tupunuk ma mot in tangis.

²⁶In laulau torom mot ra a taro rop det watung ulabo pas mot, uni a kum tumtubun det tagun numugu, det pami lenri torom a kum torotoro na poropet.

²⁷“An watungi tamot ra mot longoro iau, mot in nem anumot a kum ebar, ma mot in pam a wakakino torom det ra det nget mot.

²⁸Mot in watung udan det ra det saring o God sur in ban laulau mot, ma mot in wararing un det ra det ban laulau mot.

²⁹Ra taio in pasor tar a papor wam, un pukus ara papor bulung toromi. Ra taio in ras pas anum a saket, un madek tari kai anum a siot tano.

³⁰Un tabor det rop ra det saring ui. Ra taio in los pas tu utna anum, gong u saring meleti suri.

³¹Asau ra mot nemi sur a taro det in pami torom mot, mot kai, mot in ser pami torom det.

³²“Ra mot nem det kut ra det nem mot, din watung ulabo pas mot pepetlai? Uni a kum tene sakino kai det nem etetalai det ut.