San Lucas 6:2-32

²Sun izarawane, Fariseo awaruzne Jesústa ka kizara: —Up kammuruzne kal kiamtu. Moisés aumɨza kamtamnat kit aumɨza ka kiznara: “Kwaizkulmu payu kal kiman,” kiznara.

³Jesúsne usparuza sɨnkanara: —Au an ñamin mikawa Davidkas paiña izmuruzkas yak kiakane, uspane kuara. ¿Sun kwinta iztamakkiwas?

⁴Usne Dios yalta nap kit pan Diosta tarɨt aizpa sap kit kwat kit izmuruza nailnara. Pariyain sun pan kuashina. Ñamin Moisés kamtamnat kit kaiznara: “Mamaz awara sun pan nailnamun,” kizta.

⁵Jesúsne usparuza an sɨnkanara: —Nane, Ampu namtɨtmika, ish. Kwaizkulmu payurakas chiwazha wat mintu aizpa kinash.

⁶Mamaz kwaizkulmu payura Jesúsne Judío kammu yalta nap kit Dios pit kamtanamɨzta. Mazane, numal chihtɨ tuiltɨtmikane, tuazi.

⁷Moisés kaizta aizpa kamtamtuzkas Fariseo awaruzkas Jesústa izara. “¿Kwaizkulmu payura ussa namtanasa?” minñara, Jesús kwail kimtu kizanapa.

⁸Anpane Jesúsne uspa minñamtu aizpa pianara. Chihtɨ tuiltɨtmikasha kaizta: —Kuhs kit paizkakin kunti, kizta. Usne paizkakin kuhs kit kunta.

⁹Jesúsne usparuza mɨmanara: —¿Kwaizkulmu payura awara chima kinpai? ¿Wat kin? ¿Kwail kin? ¿Kiwain kit wat sana? ¿Piantana? mɨmanara.

¹⁰Suasne Jesúsne wan awaruza iznat kit ishtumikara kaizta: —Up chihtɨ nil sari, kizta. Paiña chihtɨ nil sarawane, chihtɨ tuiltɨtmikane wat parɨt.

¹¹Uspane Jesústa kwisha pilchapuzara. Usparuzpain chi kwail Jesústa kishiamtu aizpa minñara.

¹²Sun payu Jesúsne ɨzara Diosta paikwan ɨra. Kɨnsɨh Diosta paikwara.

¹³Kɨnmɨzkane, Jesúsne kammuruza akwannara. Suasne doceruza nanarawane, Jesúsne usparuza paiña ɨnintaruz munnara.

¹⁴Sunkana uspane ka munnara. Simónpa mun maiztɨt. Mane usne Simón Pedro mun i. Mamazne, Simónpa aimpihshne, Andrés mun i. Santiagokas, Juankas, Felipekas, Bartolomékas,

¹⁵Mateokas, Tomáskas, Santiagokas (Alfeowa painkul), Simón Celote munmikakas,

¹⁶Judaskas (Santiagowa painkul), Judas Iscariotekas munnara. Usne, minpara munmikane, Jesústa annara, awa ussa pizanapa.

¹⁷Jesúsne uspakasa ɨzaras kihshat kit sakkimin kunara. Akkwan kammuruzkas akkwan awakas wanmakkara. Judea suras awakas Jerusalén pɨpuluras awakas aara. Tiro pɨpuluras awakas Sidón pɨpuluras awakas aara, ussa mɨana, uspa ishturuza kakulninnanapa.

¹⁸Usne awaras kwail saliztuza puzninnara.

¹⁹Wan awane ussa mɨshiara. Dios Jesústa kiwainta akwa, Jesúsne akkwantuza wat paninnara.

²⁰Jesúsne kammuruza iznat kit kaiznara: “Puizaruzne wat puranazi, Dios usparuza kiwainnat kit ɨninnamtu akwa.

²¹Ma payu yak kimturuzne wat puranazi. Tukkanazi. Tayalturuzne wat puranazi. Ishananazi.

²²Awa umɨza naizninamtukas, uruza pashinamtuchikas, uruza kwail kizamtukas, u munpa kwail minñamtukas, une wat puranazi, u ap kanpamtuz namarɨt akwa.

²³Sun payura watsal uzizanaka. Dios umɨza chiwazha chiyura mɨlanamtu akwa, wat puraizanaka. Kawarain uruzpa an ñancha kwalne Dios kainammtuzakas kwail kiara.

²⁴Ma payu uztuzne, kwazpa kultɨt uzturuzne, tayalanazi. Une apa wan wat sappat kit wat uzamtu.

²⁵Ma payu tukta kumturuzne tayalanazi. Mamaz payura yak kianazi. Ma payu ishanturuzne tayalat kit azanazi.

²⁶Akkwan awa u akwa wat paarakas, une naizarɨnazi. Wat uzizanaka. An ñamin awaruzne wat chi kamtamtuza kawarain wat pit kwinta kiara.”

²⁷“Nane nawa mɨmtuza kaiznamtus: U aliztuza pashirain. Umɨza aliz kulkane, usparuza wat kirain.

²⁸¡Umɨza kwail kizkane, usparuza watsal pit pararain! Umɨza kwail kikane, us akwa Diosta paikwarain.

²⁹Mɨnpazha up matsɨhkin patkane, mamaz kanmal antain. Mɨnpazha up kamisha nakakane, mamaz kamisha ussa mɨlarain.

³⁰¡Mɨnpazha chiwazha paikukane, sunkanain mɨlarain! Mɨnpazha nu mɨj aizpa nakakane, na mɨj aizpa kailnincha, kizman.

³¹Sunkanain kitpa. Une wan awaruza wat kirain. Une mamaz awa uruza wat kinpa pashiamtu. Ukas mamaztuza kawarain wat kirain.

³²Nu up izmuruzain pashimtune, Diosta tɨrizman, nua chiwazha mɨlanapa. Dios uruza wat kiwainshimtu akwa, sunkana une wantuza wat kishinarawa. Kwail kimtuzkas mamaz kwail kimtuzakas kawarain pashiamtu.