Iluk 6:2-32

²Kenemeko, unbiliw ding dim bakate, mali Falisi kunum mak i im kanebiliw be yetemeko, bokoyemomeliw: “Wee kawtiw yutaka! Nimtew angom ete yu finengdakamin ding Sabat kaleem kukuw gelewinba keko, sak sakok kuw kebiliw a?”, yangsiliw kale.

³Yangiwi, Yesus e ilo yan weng bokoyemomele: “Yute kilele kililina! Yu Debit em sua em kemale sang be fut tem teing bokoko, ateminba kebiliw sako? Deiw mak ding mak kabalak e, eso, akalem awkunum kumel iso, i yemen tew teineko,

⁴Sunbin-Got em am yol kawtem uniwi, e am yol beem belet wanin ayem be kuluko, waneko, akalem eso biliw kunum ikati yemense kale. Kate, Sunbin-Got em belet wanin ayem be akalem am yol em kunum ayem bikalem ete kuw te.”, yangse kale.

⁵Yangeko, weng makso bokoyemomele: “Nakalem ete Kawtiw Aul kasike, ne kamok fian keko, finengdakamin ding Sabat em kukuyemin weng be bakilewkabi te.”, yangse kale.

⁶Beli, iti finengdakamin ding Sabat ding mak kelei, Yesus e Suda kunum waneng im wensankabiliw am mak kawtem elo uneko, ka biliw kawtiw ilo Sunbin-Got em weng bokoyemse kale. Beem ding dim bakate, yuk teing kuan fom yout kese kunum mak belei, e atemse kale.

⁷Atemei, Falisi kunum so, Sunbin-Got em kukuyemin weng kalem aulewko, kukuyemkabiliw kunum iso, alik alik bi Yesus elo kiin kiin fian keleweko, “Teing kuan fom yout so kunum beelo finengdakamin ding Sabat kabalak be, okmino koleweko, ken kelewoke sako?”, angeko, atemsiliw kale. Nimtew angom? I elo geelewko, alomin mongom em deiw mak fensiliw kasike.

⁸Kate, Yesus e ikalem ibolow fukunin be kal keko, teing yout so kunum beelo bokolewomele: “Kutaka! Ku alik num mutuk dim kale kel tala!”, dangei, kunum be fokfok moko, im mit mewso talse kale.

⁹Telei, Yesus e ka biliw kawtiw biilo bokoyemomele: “Yulo dakalakamin mak dakalali te! Yu kililina! Mali kawtiw mak i mali kawtiw ilo ken kukuw so, im finik ilo dokoyemkemin kukuw so, keyemiw tewe, kawtiw bi finengdakamin ding Sabat em kukuyemin weng beelo ki keko, Sunbin-Got em kiin dim e sen so banim kawtiw kelokoliw sako? Bani, mali kawtiw mak i mali kawtiw ilo wa kukuw so, yenomin kukuw so, keyemiw tewe, kawtiw bi Sabat em kukuyemin weng beelo ki keko, Sunbin-Got em kiin dim e sen so banim kawtiw kelokoliw sako?”, yangse kale.

¹⁰Yangesomelei, Yesus e ka biliw kawtiw biilo fubelet kale yetem kale yetem kebomi, teing yout so kunum beelo bokolewomele: “Kom teing be dila!”, dangse kale. Dangei, kunum beem teing be fein ken kese kale.

¹¹Kelei, Falisi kunum so, Sunbin-Got em kukuyemin weng kalem aulewko, kukuyemkabiliw kunum iso, alik alik bi kanelewse be atemeko, digaka kelewsomi, ibolow wa keleweko, ikalem kuw bokolew bokolew kesomeliw: “Nu Yesus kaleelo nono kelewokoluw a?”, ange ange keko, bokosiliw kale.

¹²Beem ding dim bakate, Yesus e kutiliw mutuk kabalak e, amgu tikin elo Sunbin-Got eso weng bokolomin unse kale.

¹³Ka kel belei, aneng iti danse ding dim bakate, e akalem gelewkabiliw kunum ilo gaayemei, i em mit mewso teliwi, e kalun kel kunum mak galmoko, “Kalan Kunum” yangse kale.

¹⁴Kunum biim wiin e kanekote: Mak e Saimon e — Saimon em wiin mak e Fita ete kale. Mak e Andulu e — Saimon em awkunum ete kale. Make Sekow e, mak e Sion e, mak e Filiw e, mak e Batolomyu e,

¹⁵mak e Matyu e, mak e Tomas e, mak e Sekow e — Alfius em min ete kale. Mak e Saimon e — E Ulom abiw mutuk fian em wonuk so kunum im maka keyemkabiliw im kunum ete kale.

¹⁶Mak e Sudas e — Sekow em min ete kale. Mak e nanew Sudas e — E Iskaliot abiw kunum bete, Yesus elo maka kawtiw im teing dim dase kunum ete kale.

¹⁷Beli, im amgu dim koleweko, bit aneng elo unsiliw ding dim bakate, i Yesus elo gelewkabiliw kawtiw banban mak biliwi, i yetemsiliw kale. Kawtiw bi Sudia aneng fian em abiw abiw angom so, Selusalem abiw mutuk fian so, okmun fian em benggew biliw abiw mutuk fian alew Tail so Saidon so beem aneng so, ikalem abiw abiw be koleweko, ka kel wensansiliw kale.

¹⁸I Yesus em weng kililomin beem dulum so, im dim alakabe kal wanin auk be kilelyemomin beem dulum so, Yesus elo atebam talsiliw kale. Teliwi, e kawtiw im dim biliw aneng matil mali mak akati takala koyemse kale.

¹⁹Sunbin-Got em auk so kitil so be Yesus em dim gekse kasike, kawtiw alik alik bi elo melelewomin telesomi, “Nukalem wakamin be kilelyemoka!”, angsiliw kale.

²⁰Angsomeliwi, e akalem gelewkabiliw kunum ilo bokoyemomele: “Em banim baluw kawtiw yu kalfongeko, kakatemoliwka! Nimtew angom? Yu Sunbin-Got em gawman ding dim kel bokoliw kasike.

²¹Kame yu wanin banim yemen tew tein kebiliw kawtiw yu kalfongeko, kakatemoliwka! Nimtew angom? Bi e, yu wanin ken waneko, ki kemokoliw kasike. Kame kal ilum kuluko, amebiliw kawtiw yu kalfongeko, kakatemoliwka! Nimtew angom? Bi e, yu abenggilokoliw kasike.

²²Feinka! Yu Kawtiw Aul nelo, ‘Fein!’, nangeko, nelo nenggelewbiliw kawtiw kebiliw kasike, i yulo ibolow kaim alel kuw keyemeko, yulo ikalem wensankabiliw am dakaleko, weng miyemsomi, yom wiin wa keyembiw tewe, yu kalfongeko, kakatemoliwka!

²³Nimtew angom? Sua kel akate, ikalem aliwol fasel kumel ikati Sunbin-Got em bontem dim bakamin kunum ilo yulo kaneyemkabiliw kukuw emdiw keyemaliw kasike. Feinka! Abiil tikin katiw kel, yu yan fian mak kulukoliw kasike, kakateko, wimoliwka!

²⁴Kate on kisol wiin fian so kawtiw yutaka! Yu kilelbiko, boliwka! Nimtew angom? Yu kameem ding dim kale, beem dulum elote ibolow menew kulukabiliw kasike.

²⁵Kame wanin wanbomi, atin kuw ki kebiliw kawtiw yukati kilelbiko, boliwka! Nimtew angom? Yu wanin soul banimei, yemen tew so teinokoliw kasike. Kame abenggiliw kawtiw yukati kilelbiko, boliwka! Nimtew angom? Bi e, yu ameko, sakik kesomeliwi, yom kiin ok e mitoke kasike.

²⁶Yom wiin daokabiliw kawtiw yu kilelbiko, boliwka! Nimtew angom? Sua kel akati, ikalem aliwol fasel kumel i dasuw angeko, ‘Nu Sunbin-Got em bontem dim bakamin kunum nute te!’, angakabiliw kunum biim wiin daoyemalenaliw kasike.

²⁷Yu nem yulo bokoyembi weng kale kilele kililina! Maka kawtiw ilo ibolow fian duyemoliwka! Yulo ibolow kaim alel yetemiw kawtiw ilo yusik kukuw ken kuw kukuyemoliwka!

²⁸Yulo yakok weng bokoyemiw kawtiw ilo yusik bamki so weng bakayemboliwka! Yulo betbet duyemiw kawtiw ilo yusik Sunbin-Got elo dakalaliwi, e ilo folok ibolow so keyemoka!

²⁹Kuleng baka keyeme kunum beelo yom kuleng mali akal kaleyemboliwka! Yom asolow ilim yakut kebiliw kawtiw ilo yukalem mali ilim akati dukayemboliwka!

³⁰Mesesem eisneng mak genyembiliw kawtiw ilo yusik mesesem eisneng be fein dukayemboliwka! Mesesem eisneng mak sak kuw kuliw kawtiw ilo yusik kanelom kitil keko, ‘Iti kuluma!’, yangbokoliw te.

³¹Yom ibolow tem em fukunomeliw: ‘Kawtiw i nulo kaneyemoliwka!’, angbiliw beemdiw yusik mali ilo kaneyemboliwka!

³²Nimtew ibolow fununbiliw a? Yulo ibolow fian keyembiliw kawtiw ilo iti ibolow fian duyemiw tewe, Sunbin-Got e yulo beem mongom ete ‘Nem angin ken ati te!’, yangoke sako? Beemdiw, yulo ken kukuw kukuyemiw kawtiw ilo iti ken kukuw kukuyemiw tewe, Sunbin-Got e yulo beem mongom ete ‘Nem angin ken ati te!’, yangoke sako? Itel bate! Sili sili nam kawtiw alik alik bikati kanekabiliw kasike.