San Lucas 6:2-32

²Chiy gunabdiidx tuby tiop de fariseu laadeb: —¿Xínii runtɨ ni quɨt riáld gúntɨ de dxi ni rzilaaz bniety?

³Jesús cuaibny: —¿Ta gady guuldtɨ lo xquiits Dios ni baany David tuby güelt chi bldiaanbɨ cun de xcumpnierbɨ?

⁴David biiub láani yudoo xte Dios ax cuáab de guechtily ni abiacldee par bquiinbɨ. Ziyza bdeedbɨ de guechtilqui de xcumpnierbɨ ni zuguané laab, ne masquɨ de bxozzi ná par iquiiny de guechtilqui.

⁵Chiy raipzacny laadeb: —Ne nare Bniety ni bxiaald Dios napzaca guelrnabee par dxi ni rzilaaz bniety.

⁶Stuby dxi ni rzilaaz bniety, Jesús biiuny láani tuby yudoo ax guzulo caseedny de bniety. Ruy zuguaa tuby bniety nguiu ni gubiz naani lad naldí.

⁷Ne de maistrɨ ni nán ley cun de fariseu caldaatsdeb Jesús par íguiaadeb dún la siacny bnietqui dxi ni rzilaazdeb, ziy xquel par gapdeb nez chúu xi icuaquiadeb Jesús.

⁸Per laany nánnacny xi xgab cayundeb ax raipny bniety ni gubiz naani: —Güesuldí. Güezuguaa glayre. Bnietqui güesúb ax guzuldíb ruy.

⁹Chiyru raipy Jesús laadeb: —Inabdiidxa laat tuby cos: ¿Xi ná par gún bniety dxi ni rzilaazni? ¿Ta tuby cos güen o tuby cos mal? ¿Ta gacné bniety guelnabány o idzɨcá bnietni?

¹⁰Chiyru bguiaa Jesús lo irate de bniety ni zuguané laany ax raipny bnietqui: —Bldí noo. Bnietqui baanbɨ ziy ax biac naab.

¹¹Per stuudxdeb quesentiand bdxiichdeb, chiy guzulo raipdeb de saadeb xa xquel gúndeb contrɨ Jesús.

¹²Láani de dxiqui, Jesús güeny láani tuby dany par güenaabny lo Dios. Gudedgueeltec gunaabny lo Dios.

¹³Chi bragueel, gurɨdxny de xpɨnny ax gulény tsɨbtiopdeb de ni gulelány apóstol.

¹⁴De bnietré ná ni bcuabeeny: Simóny ni gulelány Bed, Andrés bets Simóny, Jacob cun Juany, Liby cun Bartol,

¹⁵Madeu cun Mally, Jacob llingaan Alfeo, Simóny ni bdxaa lo de cananista,

¹⁶Judas bets Jacob cun Judas Iscariote ni baany entriagu laany.

¹⁷Jesús biatny quia danyqui cun de apóstol. Ax guzuguanény laadeb tuby lat rut ná tubylo, cunru zienguilliú de xpɨnny, ne cunru zienguilliúza de bniety ni zá iranezte, zeclɨ de bniety ni zá nez Judea, cun de bniety Jerusalén ne de bnietza ni zá gax ruu nisdoo de nez rut lá Tiro ne Sidón. De bnietré beeddeb par guindiagdeb ni rnii Jesús ne par yacdeb xte de guelguidx ni rápdeb.

¹⁸Ziyza biac de ni nuu bɨndxab láani lazdooni.

¹⁹Irate de bnietqui rcaazdeb niguaalddeb Jesús pur ni rsiacny iratedeb cun guelrnabee ni napny.

²⁰Chiyru Jesús bguiaany lo de xpɨnny ax raipny laadeb: —Xíclabaat, de prob, te pur laat riáldtɨ lo guelrnabee xte Dios.

²¹’Xíclabaat laat ni rldiaantɨ anre te pur laat teru guialtɨ. ’Xíclabaat, laat ni cayúuntɨ anre, te pur teru chúu dxi saclaaztɨ.

²²’Xíclabaat chi rdxichné bɨny laat, chi rdialáa bɨny laat, chi rgué bɨny lot, chi run bɨny despresy laat zec tuby ni quɨt illiú pur causɨ ni reldilaaztɨ nare Bniety ni bxiaald Dios.

²³Quesentiand gulzaclaaz chi runné bɨny laat ziy, te pur laat zaptɨ premyroo llayabaa. Te pur ziygac banné de to xpɨngul de bɨnquɨ de profet gulal xte Dios.

²⁴’Per probzactɨ, de ricu, te pur aguzaclaaztexgat.

²⁵’Probzactɨ ni rialtɨ anre te pur teru ildiaantɨ. ’Probzactɨ laat ni rlliznégactɨ bniety anre te pur teru chúu dxi guuntɨ pur guelnalas.

²⁶’Ne probzactɨ laat ni riulaaztɨ rzubyaa irate bɨny laat te pur ziygac bzubyaa de to xpɨngultɨ de profet fals ni guu chiy.

²⁷’Per laat ni cacuadiagtɨ ni rniia, nare rniia laat: gulcaaz de ni callianné laat. Gulgac güen cun de ni rdxichné laat.

²⁸Gulganldee quia de ni rgudé laat. Gulnaab lo Dios pur de ni rgué lot.

²⁹Belati tu chia lladiagu, bdeed chiab stuby lad. Belati chúu ni idzɨcá xchamarru, bsaan chanéb né xcamilliu.

³⁰Tutix ni inaab liú xirullzi, bdeedni. Ne ni idzɨcá ni ná xixtenu, quɨt gúntiu quej.

³¹Gulgaany cun iraru de bniety zec ni rcaaztɨ gúndeb cun laat.

³²’Belati laat rcaaztɨ púrzi de ni rcaaz laat, xíteete güenti quɨt cayuntit, te pur axt de bɨny mal run ziy.