Lukasi 6:2-32

²Mafalisayo wamwenga nawawauza, “Lekachoni mwangudita mbuli hambe ikundigwe kudita Zuwa lya Kwesela?”

³Yesu nakawedichila kawalonjela, “Hamsomile vyonayaditile Daudi na wayage lowali na nzala?

⁴Heye nakenjila ng'handa ya Nguluwi, nakahola mibumunda jilavigwe kwa Nguluwi kalya na kuwapa wayage. Malajizo hambe gakundize wanhu wanji kulya mibumunda ajo, ila wakulu wa watambika yeng'ha.”

⁵Ahyo Yesu kuwalonjela, “Mwana wa Munhu ndo Mkulu wa Zuwa lya Kwesela.”

⁶Zuwa linji lya Zuwa lya Kwesela, Yesu nakenjila mng'handa ya kusalila, kuwalangusa mla mng'handa mwali na munhu yumwe nayali na moko wakudilo uziliche.

⁷Walangusa wa malajizo ga Musa na Mafalisayo wamwenga nawekala wopala chinhu cha kumlonjeleza Yesu. Ahyo wazangubeteza walole komlohola munhu kuli Zuwa lya Kwesela.

⁸Ila Yesu nakavizela gowalingijesa, nakamlonjela yula nayali na moko uziliche, “Winuche uye wime hano.” Yula munhu kaluta kema hagati.

⁹Baho Yesu nakamlonjela. “Ndangukuuzani hemwe, kuli Malajizo ga hetwe ikundigwa hemwe kudita choni kuli Zuwa lya Kwesela? Kudita ganojile ama kudita gehile? Kulohola ukomu wa munhu ama kwajiliza?”

¹⁰Kawalola wanhu weng'ha wowekalile hala, na baho nakamlonjela yula yaziliche moko, “Ugolole moko wa hegwe.” Na heye kadita hiho na moko wa heye uwa mkomu kahi.

¹¹Ila hewo wazanguzudila ng'hatu wazangilonjela wawo chinhu chachi chihile chowomditila Yesu.

¹²Zuwa limwe Yesu nakaluta kuchidunda kulanda, yalimeho kuko hamihe yeng'ha yomlanda Nguluwi.

¹³Mitondo lokuchele kawachema wala walanguswa wa heye, kawahagula kumi na weli kulawa mumula mli hewo na kuwachema watumigwa.

¹⁴Awo ndo Simoni yula Yesu yampele itagwa lya Petili na Andeleya mng'holoze na Yakubu na Yohani na Filipo na Batolomeo na

¹⁵Matei na Tomasi na Yakubu mwana wa Alufayo na Simoni yalinguchemigwa mtowanila isi ya Isilaeli na

¹⁶Yudasi mwana wa Yakubu na Yudasi Isikalioti yula hamba yamhinduche Yesu.

¹⁷Yesu loyeduliche hamwe na walanguswa wa heye mchidunda, Yesu nakema honhu hawele na ibindi hamwe na chilundo cha walanguswa wa heye na lung'hongola lwa wanhu walawile nzingo zeng'ha kulawa Yudeya na Yelusalemu na kulawa kumwhani ya Tilo na Sidoni.

¹⁸Weng'ha nawoya kumhulichiza Yesu na waloholigwa matamwa gawo. Vivila wanhu waliwogazigwa na chijeni chihile na woya na kuloholigwa.

¹⁹Wanhu weng'ha nawagana kumdoliza Yesu, nawona mong'ho wali ulawa mgati mwa heye na weng'ha waloholigwa.

²⁰Yesu kawalola walanguswa wa heye, kalonga, “Mbweda hemwe wazunwa, kwa vila Undewa wa Nguluwi wa hemwe.

²¹Mbweda hemwe mli na nzala sambi, kwa vila hamba mogutizwa. Mbweda hemwe muwele kulila sambi, kwa vila moza sechelela.

²²Mbweda hemwe wanhu wokwihilani, wokubagulani na kuwaliga, na kuwalonga hemwe mwiha kwa mbuli ya Mwana wa Munhu.

²³Msangalale na kuvina ago hogolawila, kwa vila chonolo chomuwichilwe kilanga chikulu. Kwa vila wasekulu wa hemwe na wawaditila waloli wa Nguluwi hiho.

²⁴Ila mane mwemwe hemwe muwele na lufufu, mina mhela wa hemwe wa kusechelela umala.

²⁵Mane mwemwe hemwe muwelengiguta sambi, mina hamba mohulika nzala! Mochona hemwe muwelenguseka sambi, mina hamba mozangulila!

²⁶Mogaya ng'hatu kota wanhu weng'ha, wone wanhu wawatogole, mina wasekulu wawo nawawaditila hiho waloli wa udesi.

²⁷“Ila ndangukulonjelani hemwe muwelengunyhulichiza, muwagane wang'honyo wa hemwe, muwadile ganojile wakwihileni.

²⁸Muwatambichize wala wawelenguwapanjilani, muwalandile kwa Nguluwi wawele nguwaditila gehile.

²⁹Munhu wone yakutowe izeze limwe mgalamlile na lya keli. Munhu wone yakusukule ikoti mlechele yahole na igwanda lyako.

³⁰Chila munhu yokulanda chinhu umhe, na munhu wone yakusukule chinhu cha hegwe uleche kumlonjela yakuhilulile.

³¹Waditileni wanhu kota vila vyomlingugana wanhu wawaditileni hemwe.

³²“Na wone mzenguwagana wala walinguwagana hemwe yeng'ha, mopegwa choni? Haduhu. Kwa vila na wehile nawo wanguwagana wala walinguwagana hewo.