Luk 1:67-79

⁶⁷Na i mà Dyan, dunan Sakaraya, fnò kenen i Mtiu Tulus, na tulenan i Tnalù Dwata, manan,

⁶⁸“Dnayento i Amuto Dwata, dunan i fnangamfù i bel Israél, du ta kel kenen di dad ton na banlén ato kagalwà.

⁶⁹Ta nun dek Dwata Falwà too maltulus. Na yé gutambulan ku Dabid, i snalig Dwata.

⁷⁰Yé fakang Dwata fagu di dad tugadan mtiu di munan.

⁷¹Falwàan ato di dad to dmuen gito na di kagot i dad to muteh gito nawa.

⁷²Fite Dwata i kakdon di dad gutambulto, na fandaman i fakangan too ti tluh.

⁷³Ani fakangan di ku Abraham, dunan i gutambulto, na falwàan ato di kagot i dad to dmuen gito du fye gmagan ato mimò i knayèan di landè klikòto.

⁷⁵Du yé kayèan ku mtiu ato na tluh ato di kanfen kel di gusen i knèto dini di tah tanà.

⁷⁶Na ge, ngàgu, matlo ge tugad i Too Mdatah Dwata du muna ge di Amuto fye fatlagadam i dalanan,

⁷⁷du fgadèam di dad to i Dwata gablà di kagalwà fagu di kfasinsya Dwata i dad salàla.

⁷⁸Yé nimò Dwata du too kenen kamdo, na i kakelan dini di gito salngad di ksut i du,

⁷⁹du kenen i tmuyal i dad to mnè di gukmifuhan na di fati, na neben ato di ktanak nawa.” Yé man Sakaraya.