LUKU 1:67-79

⁶⁷Ito ahola Jekolaeyadaya Omaimidana weuna oluholimo ukalau lemeko minokoko ilime lalo okaiyoko, ga mako sa-loko ohuwa hukoko liye:

⁶⁸We napate Omaimoya Isilaelo wewena lemodaya lilime wati okadanaki lahelamibo nesautima lilimekaiye.

⁶⁹Elekele oluhola Dewitida ouvamela mota lahelametibo nesauti lilimitibo ahoda maya le sinoko hekaiye.

⁷⁰Hapaya eimola epalauti ga likaka wesiya dilime lalo iyoko, ga mako koha moliki sa-likima liminaboma ne:

⁷¹Lowa hi limiki asowalaki nesa li limiki sa-niabo wewenasida dadeutiya lilime oli ekolaiye.

⁷²Latatelesidama eke lobetoko dilimituwe loko lo molaibo ne. Ga loko wasa jekaka gaya liboyaloya ele-minoko sa-oletakolaiye.

⁷³Ito latate Aebalahamudama sa-loko elewole oko lo moloetaibo nenako,

⁷⁴yamuya lowa ulatelo wewenatelesilokatiya lilimekadeko hulu oko minakolune,

⁷⁵ito lukaya eto eto oko minoko gateya minamideko elekele oluhola lolo oko mino-loko woko minoko heletune. Sa-onenako, Omaimidana epoka letune.

⁷⁶Ito emo maya ipalikaya, We napamidana gala lo-lele moneko anulaya wiletataniyo, emokumuya okulumauti Omaimidana epalauti ga lokaka we likiya likilae.

⁷⁷Emokahoya Omaimo wewenalale yuhasida esenipo vobetaibo gama lo bekaniyoko, eli wehe likadeko lihimanipoma le hulobetakolaiye.

⁷⁸Lemo Omaitemoya lemo milumate elekaka noinako, emo letibotoya okulumaloya okululuwa nohokeko

⁷⁹lubukamidana ukauka ito helekaka anuguya minudawo wewenaya leya jeko le lameda loletakolaiye. Sa-ideko, onawa lalomidana anulaya soto pekadeko yauya wekolune, loko Jekolaeyakahoya liye.