Luka 1:67-79

⁶⁷Zakariya, tati gwa Yohani kamemiziwiti Rohu Mnanagala, katungiti shisoweru shiwagira sha Mlungu.

⁶⁸Tumkwisi Mtuwa, Mlungu gwa Israeli! Kiza kuwatanga wantu wakuwi na kuwakombola.

⁶⁹Katupanana mlopoziya mkulu Mushiyiwuku sha Dawudi ntumintumi gwakuwi.

⁷⁰Gambira ntambu yakawagambiriti wambuyi wa Mlungu wananagala kwanjira kwanja.

⁷¹Hakatulopoziyi kulawa mumawoku mwa wangondu wetu na kutulaviya kulawa mumakakala mwa woseri yawatufira ndiri.

⁷²Kalongiti hakawawoneri lusungu wambuyi wetu, na kulihola lipatanu lyakuwi linanagala.

⁷³Kulirapa kwakamlapiriti Aburahamu mbuyi gwetu,

⁷⁴kuwera hakatutangi twenga tulopoziwi kulawa kwa wangondu wetu. Katugambira tumtenderi Mlungu pota na lyoga,

⁷⁵tuweri wananagala yatumfiriziya Mlungu mashaka goseri ga makaliru getu.

⁷⁶“Na gwenga mwana gwangu, hawakushemi mbuyi gwa Mlungu kakumpindi nentu. Toziya hagumlongoleri Mtuwa kumnyawila njira yakuwi,

⁷⁷haguwagambiri wantu wakuwi kuwera hawalopoziwi kwa kuwawusilira vidoda vyawu.

⁷⁸Mlungu gwetu mnanagala na yakawera na lusungu. Hakatulavilili gulangala gwa ulopoziya kulawa kumpindi,

⁷⁹na kawalangazira woseri yawalikala muluwindu lwa kuhowa, na kuwalonguziya magulu getu munjira ya ponga.”