Lukas 1:67-79

⁶⁷Iwe, Sakarias semen Johannes a ur ren Ngünmifel o a apasatä an kei kapasen osuni:

⁶⁸“Ousipwe mwareiti ewe Samol, ewe Koten Israel! Pun a feito pwe epwe alisi nöün aramas o angaseer.

⁶⁹A awora fän itach eman Chon Amanau mi manaman, i eman mwirimwirin nöün chon angang Tafit.

⁷⁰A fen pwon me lomlom ren nöün kewe soufos mi pin

⁷¹pwe epwe amanaua kich seni chon oputach, seni pöchökülen chokewe meinisin mi oputa kich.

⁷²A apasa pwe epwe pwäri an ümöümöch ngeni ach kewe lewo o chechemeni an we pwon mi pin.

⁷³A pwon fän akapel ngeni semelapach Apraham

⁷⁴pwe epwe amanauakich seni chon oputach o mwüt ngenikich pwe sipwe angang ngeni, nge sisap niuokus,

⁷⁵sipwe pwal angang ngeni lon pin me pwüng me mwen mesan lon ränin manauach meinisin.

⁷⁶Nge en, nei, kopwe iteni nöün Kot ewe mi Unusen Tekia soufos. Kopwe akom mwen ewe Samol, pwe kopwe amolätä alan,

⁷⁷kopwe pwal asile ngeni nöün aramas pwe repwe küna manau ren ar küna amusamusen ar tipis kana.

⁷⁸Ach Kot a ümöümöch o lukpwetete. Epwe awora ngenikich ewe Saramen Manau seni läng,

⁷⁹pwe epwe tinetiu won chokewe mi nom lon rochopwak me nürün mäla, epwe pwal emweni pechech ngeni ewe alen kinamwe.”