Luk 1:67-79

⁶⁷Awan Urgun Jon taman Sakaraia ilon iŋanefuteg, iŋ profet ru en ibol a,

⁶⁸“Id Tubun en per tupani wa, iŋ mi Isrel san Anut. Iŋ ipalug iŋsan tamolpein yil go idad iŋal a.

⁶⁹Iŋ tamol dabai ak ta, id patud ipasi san igane ilasa ya. Tamol en man, iŋsan urat tamol Dawid san dar lo ilasa ya.

⁷⁰Wagam na mok iŋsan profet gun adi awad lo ru en ibol:

⁷¹Iŋ idsad ager banid lo ipasad iŋiliad a. Agod tamol a id lo siai digane dan tuod lo dam ipasad iŋiliad a.

⁷²Iŋ idsad tubud baged ilo muŋanek ikubiai pidinai a. Ago dugo iŋsan kontrak gun an niŋen o ilon isou a.

⁷³Iŋ idsad tubud baged Abraham ru promis en irupeig ibol:

⁷⁴Id ager tuod lo ipasad pe id ilo urer tiap, iŋsan urat tigane wa.

⁷⁵Id saen fidian tan e lo tumado den lo, iŋ naon na kagin gun ak lo, agod kagin itaot ak lo dam ago tigane wa.

⁷⁶O ŋai nanug, oŋ Anut lak na geig ak san profet dubol a. Man dugo, oŋ umug pe Tubun en san dal kubune pani wa.

⁷⁷Iŋanen tamolpein patu pasek ka diŋane wan, oŋ maŋau en pidinai a, Anut iŋaned aupasek isuas pidinai dan lo patud ipasi san duloŋ fufei a.

⁷⁸Idsad Anut iŋanen ilo muŋanek lo ago igane ya. Iŋsan ilo muŋanek lo, iŋ Nanun ad isuda dak igo woŋ kumaen panu nap idsad na ipalu wa.

⁷⁹Agop iŋanen lilaman tamolpein a tidom tubun lo dumado dan, agod mateŋ san mirau lo dumado dan dam, tinid isapudade wa. Agop maror san dal ikubiai panad pe fo tator a.”