Luka 1:67-79

⁶⁷Wà Zakaria, pwi caa kà i pwi nari èpo, âna dipitirié ê Nyuâaê Pwicîri, â é inapàpari ê popai na é naa têe wà Pwiduée. Â é ina pâ:

⁶⁸«Pwamaina Pwi Ukai, Pwiduée kâra ê Ba, ê Ba Isaraéla. Ba é pa-udòjè, tipijè jii èpà kâjè.

⁶⁹Dau pwa pàtàma wà pwi a-upajè, pwi gòobàra Davita, pwi ênawéna kêe.

⁷⁰Jèe nye gòiri ê pai ina kêe pwiri. Ba rà inapàpari tèpa péroféta na é pitòrigarirà.

⁷¹Ba é jèe ina pâ: “Go o mwa pa-udòwà jii tèpa pièpàriwà.”

⁷²Maina pimeaari kêe tà tèpa jojoorojè. É nye pacoo diri kaa auipwataâboro kêe,

⁷³na é naa tà Abéraama, wà pwi jojoorojè, naa na pimeaari kêe. É gére ina naa goojè, pâ:

⁷⁴“Go upa tèpa naîgà, jii tèpa pièpàrirà. Rà o piênawéna kôo; o càcaa wâgotàra.

⁷⁵Rà o wâdé na arao, â o tàrù pwâranümarà, na diri pai wâro kâra wâni gòropuu.” Nabwé.»

⁷⁶Â wà Zakaria, âna é pame ê popai bèeni goo wà pwina naîê, Ioane: «Wâgà pwi nari âboro èpo bèeni, âna: Gà o pwi Péroféta: Gà o ipa popai kà Pwiduée Caa, na é tâdòiti. Gà o pâbéaa kà wà Pwi Ukai; pwabwàti naigé kêe.

⁷⁷Gà o ina târa Ba kêe: Ée mwa pa-udòwà, ba na guwà wâro. Ée mwa pwanauri ê pâ èpà kàwà.

⁷⁸Maina pai wâdé kêe! É tèepaa marijè; é pame ê pwéelaa, pwacèwii pai tèepaa kâra dapàra tòotù.

⁷⁹É èù mari tàpé na rà tâa na bàutê, bàutê kâra pwâra bà. É tòcia tàra naigé naa na pinaanapô. Nabwé.»