Luka 1:67-79

⁶⁷Ma tamana, Sakaria, i buka ma ra Takodo na Tulungen, ma i varvai na propet dari:

⁶⁸Da pite pa ra Luluai, ra God kai Israel; tago i tar tadap ra taraina, ma i tar pait kapi kadia varvalaun.

⁶⁹Ma i tar vatur ra dekdek i kada varvalaun ta ra kuba i kana tultul David,

⁷⁰(Da i ga tatike ma ra ngie i kana lavur propet papa ra vunapai ra rakarakan a gunagunan),

⁷¹A varvalaun kan kada lavur ebar, ma kan ra lima i diat bula dia milmilikuane dat;

⁷²Upi na vaarike ra varmari tadav kada lavur lualua, ma upi na nuk pa kana gomgom na kunubu;

⁷³Ma kana tinata bula i ga vavalima me tai tama i dat Abaraam.

⁷⁴Ba na valaun dat kan ra lima i kada lavur ebar, upi dat a toratorom tana, ma koko dat a burut;

⁷⁵Dat a torom ta ra luaina matana ma ra gomgom, ma ra mangamangana takodo ta kada nilaun par.

⁷⁶Ma da vatang u natugu, ba u a propet kai ra Ngala Muka; Tago una lualua ta ra Luluai, una mal are kana lavur nga;

⁷⁷Upi da vamototone kana tarai ta ra varvalaun, ma ta ra punpun vue ai kadia lavur varpiam,

⁷⁸Ta go ra ngala na varmari kai kada God, a lar marama na vana rikai ta dat i tana.

⁷⁹Na rarao taun diat dia kiki ta ra bobotoi, ma ta ra malur na minat bula, upi na vateten ra kau i dat ta ra nga na malmal.