SAN LUCAS 1:67-79

⁶⁷A̱ ntá itꞌé tí xjan mé chꞌín Zacarías, mé a̱ntsí kꞌuáyéhe̱ chꞌán kjuachaxin kuènte Ncha̱kuen Dios ntá xi̱kaha nixja chꞌán itén Dios ntáchro chꞌán kíxin:

⁶⁸Imá jína Ìnchéni, na mé tí Dios kuènte tí nación Israel, kíxin ikui chꞌán tí tjejóni kjuínchekaá chꞌán nación kuènténi.

⁶⁹La ko kjuanjon chꞌán ijnko nkexro tꞌe̱to̱an sinchekaáni chꞌán na mé ijnko nkexro kꞌuaxrjeníxin tí chꞌín David, tí nkexro kꞌuékjichꞌehe Dios xra̱.

⁷⁰Éxí kꞌuéchronkaxín tí sín kjueyá Dios kꞌuéchrónka itén Dios ósé,

⁷¹kꞌuéchronka Dios kíxin sinchekaáni chꞌán kíxin ntá tsjachahya kaín tí sín nínkakonhenni,

⁷²tsi̱konóe̱he̱ chꞌán tí sín kꞌuaxrjeníxinni ósé, tsꞌitjáyenhya chꞌán tí nkehe tsíchronka chꞌán tsoxiteyá.

⁷³Tíhi mé tsíkjo Dios tí chꞌín Abraham ósé kíxin nkehe chaxín tsoxiteyá chrꞌéxi̱n

⁷⁴kíxin sinchekaáni chꞌán kíxin kohya nkehe sichꞌeheni tí sín nínkakonhenni kíxin jína sichꞌeheni chꞌán xra̱ tsochrakonhyani,

⁷⁵la ntá jína tsꞌejóni sinchetjóáni chꞌán kaín ya̱on tí na̱xa̱ tjejóchónni.

⁷⁶A̱ ntá jaha xje̱enni mé tsontáchro Dios kíxin jaha ijnko nkexro tsochrónka itén Dios tjen nkaya nka̱jní. Jaha tsíto̱nxian nti̱a tsi̱xi̱n Ìnchéni la ko jaha tsjásiyóxian nti̱a tsi̱xi̱n chꞌán.

⁷⁷Jaha tsjákohé tí chojni chjasintajni nkexrí tsjìin tí jie̱ chónta sín, ntá tsaá sín.

⁷⁸A̱ ntá Dios mé tjuèheni chꞌán la ko kui̱konóe̱he̱ni chꞌán, kíxin nka̱jní kui̱xi̱n ijnko xrohi ni̱xin tsꞌinkaséyanxín tí ya̱on ni̱xin.

⁷⁹Tíha mé tsi̱ka̱o tí xrohi tsꞌinkaséyenxín tí sín tjejó sítié la ko tí sín chrókꞌuitjáyan, la ko tsꞌikonxínni tí nti̱a tsjanjon kjuaxróxin. Na mé kaín tíhi chrónka tí chꞌín Zacarías.