Luk 1:67-79

⁶⁷Gɔtn se, Zakari bubm Jan se, maakin̰ ɗooc ute *Nirl Salal ɔɔ Nirl Salal se ɔlin̰ taaɗ ɔɔ:

⁶⁸«KꞋtɔɔmki Mɛljege, naan̰ ɓo Raa gɛn gaan *Israɛlge, taa naan̰ ɓaaɗoga kaakŋ jeen̰ge ɔɔ dugɗenga doɗe.

⁶⁹Maakŋ ɓee gɛn ɓulin̰ Gaar *Daud se, naan̰ ɛɗjekiga Debm Kaajn̰ tɔɔgɔ.

⁷⁰Kɛse ɓo taar kɛn jeegen *salal kɛn taaɗ taar teeco taar Raa ki taaɗo do dɔkin̰ jeege tu se.

⁷¹Naan̰ taaɗjekiga ɔɔ naan̰ utu ajeki kɔɔɗn dojege maakŋ ji jee taamooyjege tu ɔɔ ji jeege tun paacn̰ jejeki eyo.

⁷²Taa naan̰ tɛɗga bɛɛ do bubjege tu ɔɔ naan̰ se saapga do *dɔɔk kɛn salal kɛn naan̰ dɔɔko ute naaɗe se,

⁷³aan gɔɔ kɛn naan̰ naamo taarin̰a bubjege tu *Abraam ki.

⁷⁴Kɛn naan̰ jaay ɔɔɗjekiga dojege ji jee taamooyjege tu se, naan̰ utu ajeki tɛɗn bɛɛ ɔɔ naajege jꞋan̰ki keem kic ɓo jꞋan̰ki ɓeer eyo,

⁷⁵ɔɔ daayum naanin̰ ki se jꞋaki tɛɗn jee salal, jꞋaki kɔkŋ taarin̰ ɔɔn̰ɔ ɔɔ jꞋaki tɛɗn nakge ute ɗoobin̰a.

⁷⁶Anum, naai goonum se, jꞋutu jaay daŋi debm kɛn taaɗ taar teeco taar Raa kɛn Taaro. Taa naai se utu Ꞌlee naan Mɛli Raa ki taa an̰ ɗaapm ɗoobin̰a,

⁷⁷ɔɔ naai Ꞌtɛɗn jeen̰ge Ꞌjeele, Raa se debm tɔɔl *kusin̰ɗe ɔɔ naan̰ ɓo debm aɗen kɛɗn kaaja.

⁷⁸Taa Raa naajege se, naan̰ debm bɛɛ dɛn aak eyo. Taa bɛɛ naan̰ se ɓo, naan̰ utu ajekiro kɔl gɔtn wɔɔrɔ taa ajeki wɔɔr gɔtɔ aan gɔɔ bɔɔr kaaɗn utu ooko kook se.

⁷⁹Naan̰ utu wɔɔr jeegen iŋg maakŋ gɔt kɛn ɔɔɗɔ ɔɔ jee kɛn iŋg taa yo ki, taa naan̰ ajeki tɔɔɗn te ɗoobm kɛn jꞋanki kɔŋ lapia.» Gɔtn se Zakari taaɗ naŋ taarin̰ bini.