Luke 1:67-79

⁶⁷Enka Alkngaltara erantama Zechariah-urna irrpuka. Erantama etnanha Altjirraka angkatja ilaka,

⁶⁸“Nurna Ingkartanha tnantjitjika, relha Israel-arinya ntjarraka Altjirranha. Era nurnakurna, relha ekuranha ntjarrurna tangitjala pitjika, nurnanha tangkalhelaka turta.

⁶⁹Era artwa tangkalhelanha ekarlta nurnakurna yairnaka. Era David-aka ramarama nama.

⁷⁰Imankantema, urrpia ekuranha ntjarrarlarlanga era nurnanha lhelaka,

⁷¹era nurnanha leltja nurnakanhanga tangkalhelitjinala, relha lenha ntjarranga turta, etnala nurnaka yirrkngerramanga.

⁷²Era nhanga errilkngipata nurnakanha ntjarranha ilaka, era etnaka montjamontja ntelalhitjinala, era turta lhelintja ekuranhaka ilpangkitjinala.

⁷³Angkatja ekarltala era Abraham-anha lhelaka,

⁷⁴era nurnanha leltja nurnakanhanga tangkalhelitjinala. Nurnantama ekura tnoatnoa urrkurrkintja nitjinanga.

⁷⁵Nurna turta kutatha arratja ntelalhitjinanga, ekura arltamarlta eterramala.

⁷⁶“Worra nukai, unta pula Altjirra Kngarra ekura urrpiala nitjina. Untantama Ingkartnga arrkurla lhitjina, ekura tjaiya urrkaputjika.

⁷⁷Unta relha ekuranha ntjarranha ilitjina Altjirrala etnanha tangkalhelitjinala, korna etnakanha iwumala,

⁷⁸era kangkintja montjamontja namanga warta. “Altjirrala Tangkalhelanha erinha nurnakurna alkiranga yairnitjina.

⁷⁹Arai, nurna relha errilknga ngerra nama, pmara thapathapala turta. Altjirraka Tangkalhelanhala nurnanha parrtjilitjina, lirnngala ngerra. Era turta nurnanha kaltjinthitjina, urlarrakurlarra rilhera ntelalhitjika.”