Lucas 1:67-79

⁶⁷Ekꞌuchiriꞌ, ri Zacarías ruqaw ri ralko ala xujeq kaqꞌalajisanik ma ri Santowilaj Ruxlabꞌixel ri Dios xqaj lo puwiꞌ; jekꞌuwaꞌ xubꞌiꞌij:

⁶⁸«Lik nim uqꞌij ri Dios Qajawxel re Israel ma xkꞌun qukꞌ re kojoꞌlukolobꞌej ri oj utinamit.

⁶⁹Xutaq lo jun Qakolobꞌenel lik kꞌo uchuqꞌabꞌ yey Rire elinaq lo chikixoꞌl ri ralkꞌoꞌal kan ri David, ri raj chak ri Dios.

⁷⁰Ma ojertan e ubꞌiꞌim lo waꞌ kuma ri qꞌalajisanelabꞌ e jusukꞌ chwach.

⁷¹Ubꞌiꞌim kojoꞌlukolobꞌej pakiqꞌabꞌ ri tzel kebꞌilow qe y pakiqꞌabꞌ ri kechꞌamin qeꞌoj

⁷²chaꞌ kukꞌut ri rutzil ukꞌuꞌx chike ri qatiꞌ-qamam y na kumeskꞌutaj ta ri santowilaj utzij uꞌanom lo ojertan

⁷³puwi ri bꞌiꞌtisinik xuꞌan che ri qaqaw Abraham.

⁷⁴Ubꞌiꞌtisim kojoꞌlresaj pakiqꞌabꞌ ri tzel kebꞌilow qe chaꞌ jelaꞌ na rukꞌ ta xiꞌin ibꞌ kaqaloqꞌnimaj

⁷⁵ronoje qꞌij che ri qakꞌaslem rukꞌ jun santowilaj qabꞌinik qasilabꞌik y jusukꞌ qakꞌojiꞌik chwach Rire.

⁷⁶Ekꞌu riꞌat nukꞌajol, kabꞌiꞌx chawe at qꞌalajisanel re ri Jun kataqan chwi ronoje; ma katnabꞌej bꞌi chwach ri Qanimajawal re kabꞌiꞌij chike ri winaq kakiyijbꞌaꞌ ri kibꞌinik kisilabꞌik chwa rukꞌunibꞌal Rire.

⁷⁷Y katnabꞌej bꞌi chwach chaꞌ ri qatinamit kaketaꞌmaj ri Dios kebꞌukolobꞌej ma kukuy ri kimak.

⁷⁸Ekꞌu ri qa Dios, ruma ri unimal rutzil ukꞌuꞌx, kutaq lo ri Jun qukꞌ re chilaꞌ chikaj, waꞌ e pachaꞌ ri Qꞌijsaq re rusaqribꞌal

⁷⁹chaꞌ kebꞌuya pa qꞌijsaq ri e kꞌo pa qꞌequꞌm y e kꞌo chuxeꞌ ri kamik, yey kukꞌam qawach chupa ri bꞌe re ri utzil chomal» xchaꞌ.