Lucas 1:67-79

⁶⁷Papänin Zacariasnam Santu Espiritupa poderninwan queno nerqan:

⁶⁸“Israel marca mayicuna, llapantsic grasiasta qor, ¡alabashun Diosnintsicta! Pemi noqantsicta rescatamarnintsic, salbamäshun.

⁶⁹Salbamänantsicpaqmi Diospa sirweqnin une rey Davidpa castancho, juc puedeq salbador yuricunanpaq quecan.

⁷⁰Que salbador yuricunanpaqmi Diosnintsic änicurnin, une profetancunatawan willacatsimorqan, queno nishpa:

⁷¹‘Chiquiyäshoqniquicunapitam noqa jorquyashqequi y salbayashqequi’ nir.

⁷²Une castantsiccunata ancuparninmi, tse änenqanta Dios canan cumplenqa.

⁷³Une awiluntsic Abrahamtam Dios änerqan

⁷⁴chiquimaqnintsiccunapita salbamänantsicpaq, y pellatana mana mantsacushpa sirwinantsicpaq.

⁷⁵Tsemi pellapaqna car allicunata rurarnin, cawenintsiccho sirwishun.

⁷⁶Y qam llullu wamra, sielucho quecaq Diospa profetanmi canqui. Diospa tsurin shamunanpaqmi puntata ewar, nunacunata willapanqui,

⁷⁷queno nishpa: ‘Israel nunacuna jutsa rurayashqequicunapitam, Dios perdonayäshurniqui, salbayäshunqui’ nir.

⁷⁸Diosmi allapa ancupämarnintsic, imeca inti qoyapa yarqamoqtano cachamonqa actsimänantsicpaq.

⁷⁹Tsemi paqascho cawaquicaqcunapaq, y wanita mantsaquicaqcunapaq actsin canqa. ¡Tsenam shumaq cawacushun Diospa cushiqui nänincho!” Quecunatam Zacarias willacorqan salbadorpaq.