Luke 1:67-79

⁶⁷Kangya-Kooranyi yoowal-koorl Zechariah, John-ang maaman, kidji Kangya-Kooranyi moorartitj baalany. Zechariah waangki Boolanga-Yirakang Warda-Kwabba:

⁶⁸“Ngala boorda yanganan Birdiyar! Baal Israel-ang Boolanga-Yira! Baal kwadja-koorl baalang moortakak, baalapany maar-yanginy kidji baalapany yalkaraniny.

⁶⁹Boolanga-Yira kwadja-yanga ngalany baalang mardayin Nop. Baal boorda barrang-ngandabat ngalany. Baal David-ang djoowak, baalang yakin.

⁷⁰Koora, baal warrin-yanga baalang Warda Marridjiny.

⁷¹Baal waangki nidja, baal boorda barrang-ngandabat ngalany, ngarl wara-wara moorta yoowart kayar-bakatj ngalany kidji yardjang ngalany.

⁷²Baal waangki nidja, baal boorda ngorna-kwabba ngalang maam-inramak, kidji baal boorda barrang-dwangka baalang kooranyi warrinya, mandang warrinya baal yanga baalapany

⁷³Baal ngwidam waangki Abraham-ak, ngalang maam-inram. Baal yanga baalang kooranyi warrin. Baal boorda barrang-ngandabat ngalany ngarl wara-wara moorta yoowart bakkan ngalany, kidji ngarl ngala kayar-yaka Boolanga-Yirang, wayarn-birt.

⁷⁵Ngarl ngala boorda nyiny kooranyi wer kwabba-djil, Boolanga-Yira-booram, mandang kedelara ngalang ngandabatang.

⁷⁶Nganyang koorlang, baalap boorda-kolitj noonookany, ‘Boolanga-Yirang Warda Marridjiny’. Noonook boorda-koorl Birdiyar koodjookat kidji kakatar baalang djooroot,

⁷⁷kidji noonook boorda-warrang baalang moorta nidja: Boolanga-Yira boorda barrang-ngandabat baalapany nginda baal nyinya-nyinya baalapang wara-doniny.

⁷⁸Ngalang Boolanga-Yira yanga koort-kwabba kidji baal bedik-bedik. Baal boorda barrang ngalang ngandabat, ngangk-mokiny yirabiny

⁷⁹nginda ngangk moonakiny Boolanga Yirang Boodjer-yen, moortamanak wininginy malitji mayartal noyitjang, kidji baal boorda-barrang-yalgawa ngalang djena djoorootal nakalang.”