Luki 1:67-79

⁶⁷Yone ina Sekalayawa Ho Napowa woliyetiyapola: Kote solo sepapolo sowa selese,

⁶⁸Niyawa Sosolo unua wapilima, Isolaiya Kotewa, ko:yawemiye Ewa inapola: e sena kesale sopoke mene silikeye.

⁶⁹Koteyawa E tima:na: tisene sena Tepiti maya sena i emiwa sena penaiya semetei nowa niwamo mene silima:na:wa hetetiyakeye.

⁷⁰(Amowa puwano fa:nemi Kote e sepatosene senala: kalaya hekeya iyawa au seyakeye),

⁷¹Eye selesekiwa niwa kisi sena tiya:wemi sita:newa mene silima:na:keye, apula: sena niwanapulu mapolo matanesene tiya:wemi sita:newana mene silikeye.

⁷²Eyawa nini kouwawa kokonose iwa seselakeye. Apula: Eyawa E sepapo solo ho:liya ene puwano timiya amowa a matanepela: enene.

⁷³Koteyawa sepapo amowa nini kouwa Epalahamema hekila sosolo fala kamo e seyakeye.

⁷⁴Eyawa niwa kisi tiya:wemi sita:newa mene silima:na: matanakeye. Apula: niwa Ewamopela: tima:na: tiya:selekiwa ipipa.

⁷⁵Alanase, ikila sopoke nini hepa:la kokolo kau tesene, niwa mane hekeyawemi Kote sikapowemi ha:na:pa:. Apula: niyawa Kote E mane seli napolo woliyetiya:pa:.

⁷⁶Apula:, ni sa:le, sikapewemiwa iyawa kewa Kote Falamo e sepatosene sena unua taposakeye. Ko:yawemiye, kewa Yesu puwano putupela: ewamo mina:na: isu seli timita: ha:na:na:keye.

⁷⁷Hanapola:, keyewi e sena kesale sopoma matana miya:na:pela: sema:na:wa, “Sikape sena nowa epe ini seyamowa kiwamo mene siliyaposakeye. Mene siliyapola:, kili olokeyatelawa Eye tiye iya:taposakeye.” Aluse, sala weyamoke selaposakeye.

⁷⁸Ko:yawemiye nini Koteyawa niwamo sosolo hauwekilise kokona Ewa nima kinisene. Alanase, hepene falemi opo si ho:liya fiya tepela: ni salo inaposakeye.

⁷⁹Inapola:, ho:liya amoke sena kesale yopolotela honosanewemi sita:nene iwa ho:lili wataposakeye. Kululu ho tapo sita:newa ho:liya amoke iwala ho:lili wataposakeye. Apula:, ho:liya amoke nini onatu onatiye ha:na:na:wa hopola tema:na: isuwa amoke walopesakeye.