Luka 1:67-79

⁶⁷Motong la Maro Amunu Silene idiwidiwi Yowan tamana yo Sakaria i, le nga ikaua Maro koonoo inbe iwete nen,

⁶⁸“Idi le imot be tayitmaka Tool Mai yo Maro kiidi Isrel, in ene! Yesoo, ya in isi be si ilonidi tooltool ki a nen ngan ipamulidi ye so dook tiap tani yo be igarungidi i.

⁶⁹Ngan tool yo Maro ikaua gurana mai panga be si ipamulidi ye so dook tiap tani yo be igarungidi i, in ipa ye rara ke kapraingi ki tani yo Dawiti i.

⁷⁰Ngan mukot yege ni nga, ngan di Maro koonoo yo ipootoo di panga ya taunu nga, ngan tiwete nen,

⁷¹ole ilonidi a ipamulidi ye di koi kiidi baedi, inbe ye di tooltool yo lodi dook tiap paidi nga.

⁷²Inbe lon tutu betanga medana ki yo muku ngan ipamede pang di sasa kiidi i, le ole lon mulumulu yidi a ilonidi.

⁷³Moolmool, ya taunu iwete moolmool le ete be ipamede betanga medana tani in pang sasa kiidi yo Apram i.

⁷⁴Ngan nanga, ole ikau idi ye di koi kiidi baedi a ipamulidi, inbe ole ipamedidi a be nen ngan tapas le tayei urata ki leu, le ke be tatattadai mulu tiap.

⁷⁵Inbe nookoot tayepe nga, ngan ole tatoo dada dook mata yo Maro lono be tatoo nga, inbe tatoo dada dook mata noonoonoo yo ki nga.

⁷⁶Ngan ong natuk i, pang dama ni, ngan ole di tooltool tikiu ong ye Maro koonoo atu ke Maro yo iyepe ete i. Inbe ole kumuku a kukarata dada pang Tool Mai.

⁷⁷Inbe ole kupagalanga di tooltool lodi a be nen ngan lodi galanga ye dada yo Maro be igiri noonoo kidi ye, inbe ye dada yo be ipamulu di ye so dook tiap tani yo be igarung di i.

⁷⁸Le Maro ole iyei nen, yesoo ya in lono paidi mai san a ilele lono yidi. Ngan la tool atu yo iwanga ke malala ki a isi pang yidi i, in ole dawa ben ke se ipiti matana nga.

⁷⁹A nen ngan nunngana ilangarai di tooltool yo tiyepe ni todo lono a gurana ke matenge iparama di nga, inbe ipassongidi le tapa ye dada yo be tayepe ye lo silene ke Maro i.”