Lucas 1:67-79

⁶⁷Despues el Espiritu Santo ya controla con Zacarias, y ya habla le este mensaje de Dios:

⁶⁸“Alaba kita con el Dios el Señor del nacion Israel, cay ya vene ya le para ayuda con el maga gente del di suyo nacion, y para libra canila.

⁶⁹Ya manda ya le canaton un Salvador bien poderoso, que ta sale na linea di David el servidor de Dios.

⁷⁰Antes pa, por medio del di suyo maga profeta, Dios ya habla que ay salva le canaton.

⁷¹Ya promete le salva canaton na mano del di aton maga enemigo, y na mano de todo aquellos ta odia canaton.

⁷²Y ya habla le que ay tene le lastima con el di aton maga tatarabuelo, y ay cumpli el sagrada promesa que ya hace le canila.

⁷³Ya jura gayot ele con Abraham

⁷⁴que ay acudi le canaton na mano de todo el di aton maga enemigo para sirvi kita con ele sin miedo.

⁷⁵Necesita kita rindi el di aton corazon con Dios, y hace tamen cosas bueno na su vista na entero vida di aton.”

⁷⁶Despues si Zacarias ya habla con el bata: “Si para contigo, mi anak, ay queda tu nombrao el profeta de Dios bien poderoso, cay ay man una tu camina con el Señor para prepara el camino donde le ay pasa.

⁷⁷Y ay habla tu con el maga gente si paquemodo sila ay tene salvacion por medio del perdon del di ila maga pecado,

⁷⁸cay el di aton Dios bien lastimoso y cariñoso, y ay causa le alumbra canaton el luz del di suyo salvacion.

⁷⁹Aquel luz ta sale na cielo ay alumbra con todo el maga gente quien ta vivi na sombra del muerte. Y ese luz ay guia con el di aton pies para pasa kita na camino de paz.”