Luk 1:67-79

⁶⁷A Sakaria tamagna a Jon ke vonungia na Tarunga ke Tabu, me tuturi aua na hava a God ke velea:

⁶⁸“Ighita kati kilothaba a Lod, nida a God ighita mara Israel, eigna imanea ke mai me vamamaluhara nigna na mavitu.

⁶⁹Imanea ke heghita a Vahavi ke heta tagna na vinahuhugna a King Deved, nigna na mane agutu.

⁷⁰A God ke kidi taluhaghore vanighita iaani kori haghoredia nigna na komi profet i hau.

⁷¹Imanea ke taluhaghorea gi keda vahavighita tagna nida na thevuioka, mi tagna na limadia na komi tinoni kena siriuhaghinighita.

⁷²Imanea ke rarovira ara hutuda, eigna ke talu ghaghana bohea nigna na taluhaghore ke tabu,

⁷³Na taluhaghore iangeni, imanea ke jijighi vania a tamada Ebraham,

⁷⁴na bali vahavighita tagna nida na thevuioka, eigna katida boi mataghunira kori vido ighita kati tango vania a God

⁷⁵kori puhi ke tabu meke jino tagna na matagna kori havida gougovu.

⁷⁶Ighoe a dathegu, imarea kedana kiloghogna na profet nigna a God ke thaba puala eigna ighoe koda kidi taveti nagho atu tagna a Lod bali kalitia nigna na hangana.

⁷⁷Ighoe koda titiono vanira nigna na mavitu a God, imanea tangomana keda vahavira kori vido ke talutavogha na paluhadia.

⁷⁸Nida a God keda eia iangeni eigna ke rarovighita. Vaghagna na aho ke sogala hadi, a Vahavida keda mai i popo

⁷⁹bali silada tadia arahai kena mono kori puni mena mono saragna na mana nigna na thehe. Imanea keda batughita eigna katida mono kori soleana.”