Lukase 1:67-79

⁶⁷Né gébé ɛyígémbɔ Mendoó Ukpea ɛchwɔ gbée Sakariya mmu metɔɔ́ awú meko mejɔɔ́ Ɛsɔwɔ ne alɔ mangaré aké:

⁶⁸“Gɔ́ ɛbwɔ́ áfɛɛ́ Ata Ɛsɔwɔ, ntɛ bɔɔ́ Isrɛli! Gétúgé achwɔ́ mamferé bɔɔ́ bií né defwɛ́.

⁶⁹Achyɛ́ ɛsé gekpɛ́kpɛ́gé ménchyɛ́ geŋwá ayi átané ula gepú Mfwa Dɛvid maá utɔɔ́ wuú,

⁷⁰wyɛ́ ndɛre abɔ́ ányɛ́meno mbaá bɔɔ́ ɛkpávɛ Ɛsɔwɔ abi gekwéne nnó,

⁷¹ji apoóge nyɛ ɛsé, mbaá bɔɔ́ bi ákɛlege manwá ɛsé, ne aferege nyɛ ɛsé né amú bɔɔ́ mawámé ɛsé.

⁷²Abɔ́ anyɛ́meno mangɛ́ meshwɛ mbaá ukwéne antɛ sé, ne ate menomenyɛ ukpea ɛwé jimbɔɔ́ abɔ́ anyɛɛ́ ne ɛbwɔ́.

⁷³Abɔ́ agaré gekwéne ntɛ sé Abraham ne akelé nnó,

⁷⁴aferege nyɛ ɛsé né amú bɔɔ́ mawámé ɛsé, nnó dépyɛ́ utɔɔ́ bií débɛgé ne ɛfɔ,

⁷⁵mambɛ́ bɔɔ́ ukpea bií wáwálé ne mantɛné cho né mbɛ ushu wuú, ndɔ meko kpaá tɛ dégboó.

⁷⁶Wɔ, maá wa, ákúu nyɛ́ wɔ *Muú Ɛkpávé Anyátá Ɛsɔwɔ. Ɔbɔ nyɛ́ mbɛ ne Ata Ɛsɔwɔ nnó, ɔkwyɛ́ mati jií.

⁷⁷Ɔpyɛ nyɛ́ bɔɔ́ Ɛsɔwɔ ákaá nnó, Ɛsɔwɔ akɛlege manjiínte gabo bwɔ́ ne áféré ɛbwɔ́ né ɛfwyale gabo.

⁷⁸Gétúgé ji ágɛ́ne meshwɛ dɔɔ́ mbaá bɔɔ́ yɛ́ndégébé, ji atɔme nyɛ́ muú yi achyɛge ɛsé geŋwá, achwɔ́ ayi atánege né mfaánebuú ayi mfaá mfaá nkane mŋmɛɛ́ ɛwé ɛ́tyɛ dondo,

⁷⁹ɛwú ɛ́chyɛ́ge nyɛ́ geŋgbɔ́ mbaá bɔɔ́ bí álú né gemua, ne ɛ́chyɛ́ge nyɛ́ geŋwá mbaá bɔɔ́ abi álú né manó negbo, ne manlɛré ɛsé meti ɛwé ɛ́chwɔ ne geŋwágé nesɔ.”