Ruk 1:67-79

⁶⁷Jon ohe itap Sekaraia ohe Got ohnong ma armi matip oh mamaru ham armi matipmur. Ma armi matip oh Yahsup oh ohe mutuhnong ruumsan hama teip hatporhan oh propet ire Got ohe meng ma poriptiru hat mengitipmur. Ma mengitip oh

⁶⁸Isrer dire Hanipyah Got oh gin nambutin ina dasi nahat napapat ohoh ihan orhornongwi armi mar papten han ohmuro.

⁶⁹Mama armi mar papten han orhor orhe atamreisuh han Depit ohe puh ire boknong oh dirnong namburin kasipnap han tit matporhan oh tarpam patmuro.

⁷⁰Ihat tarpam ma pat oh orhe meng pot pisashe han propet yahnap han ihirnong Noh gure namburin han tit napripramur potporhan ire ma risheru mat orhor gin dirnong namburin han oh napriporhan oh tarpam patmuro.

⁷¹Namburin han oh ihat patim dirnong mahaw naham heisup nahat napapti han ire bes teinong nahat napapatin ire bes teimdap dirnong nambur yah teinong nahen han hat patmuro.

⁷²Ihat dirnong namburin han ma napin pat oh diradire awher ihirnong Noh gurnong hinhina naham yah nahapramur ma potip meng ohsi; ihirnong ma rit atip meng ohsi gin norhe ritip meng oh gin imtipora daham dirnong gin napin patmuro.

⁷³Rih rit ma atip meng oh dire aw Epraham ohnong Arpin noh inahatipramur por awam tuketipmur.

⁷⁴Meng por ma awam tuketip oh Epraham gwe puh ihirnong noh mahaw han ire bes teidapat ambura yah teinong matipramur. Matporhan ihir norhe natamreindin oh kas timbas sa natamreipri.

⁷⁵Natamreima norhe kintei nuhur Got orhe hanmur rim ongeng mat papti da ohsi; duutin da ohsi hat ma sapti da ohsi hat sa patepri rim Epraham ohnong gipor awam tuketipmur.

⁷⁶Gin nohe mon go Hanipyah ohe aprin mandap oh gori hat sus mandap amanhem amamen matipramuro. Go imat amamen matporhan ihir wanahama gonong Mama han moh putei mahat ma pat Got orhe propetmur naporiprimur.

⁷⁷Gori sus mandap ma amamen matipra oh Hanipyah orhe kuuhan ihirnong Hanipyah oh gure er hat sapti yan oh natimbas deipat nambutipramur por am mat pisashemuro. Go ihirnong gipor am mat pisapatin ihir am hatiprimur.

⁷⁸Got orhor manap dasi naham hinhina nahapat han ohoh ihan orhor dirnong namburin han ma napripra oh atan maras mong da deipat hatin han oh dirnong napripramur.

⁷⁹Imat dirnong napriporhan oh kwitem dus patim haputin ina hat pati bap ihirnonghe has teinong matipramur. Mara manap dasi ham yah hat orhorwi sashen ohe mandap oh namgit napisasipramur. rima Sekaraia oh Got ohnong armi mar ga ritipmur.