Lukas 1:67-79

⁶⁷Opepengpeng hemuta heke Ioanes temene Sakarias pe haliu hot sapele NeHalang na helenga:

⁶⁸“Ta heto haka tote NeHalang Israel mur aria Non Soke! Iange i sio at ke halaua nena hana mur pe mene mule iri nga reria poinga poreke ngana mur.

⁶⁹Pe tung sue hemasinga e nge na kerkerenga halang ke hemas mule ita lochloch. Pe i nenge hemasmas nem at nga mata nenge Teuit (NeHalang nena hekuleileinga).

⁷⁰Hetatalonga mur nge nike te hele hote na helenga kerkereng ngana mur.

⁷¹Ke te teke NeHalang mene mule ita nga rera ngarang mur peria pe nge iri nenge muteria taua ita ero.

⁷²Pe NeHalang hele ke teke lape letena ia rera tete mur pe letena metene helenga tomunga hel nenge pengpeng toto.

⁷³Nena helenga utona nenge heleia lange Apraham ma ke mai:

⁷⁴NeHalang lape mene mule ita nga rera ngarang mur peria ke ta ume mana nge i pe ta mataua rera ngarang mur ero ol.

⁷⁵Pomalam laka poinga poreke ngana e tu nge ita ero pe ta pengpeng toto nga NeHalang matana nga etue lochloch nenge tatu nga ich.”

⁷⁶Sakarias hele lange tuna, “Iau tuk iong pe lape te hetue iong NeHalang nenge I Soke nga Lut Toto nena hetatalonga. Iong lape iong muka nge Non Soke ke o hepengia nena kue.

⁷⁷Pe o hele lange hana lochloch ke NeHalang lape hemas mule iri ke pomai: lape saua reria poinga poreke ngana mur ke te lasus toto.

⁷⁸NeHalang letena poreke hali ia ita nga rera poinga poreke ngana mur pe tangtang ia tutuna mur ita ke poi ke manga chaia matana nenge haka

⁷⁹pe tualeme sio at nga tapa pe tua hatalia ita nenge ta tuteu nga metenga ana mulil. Pe henonoua ita nga kue nenge langa tunga nge nek.”