LUCAS 1:67-79

⁶⁷But'ul i pusic'al ti Ch'ujul bʌ i Ch'ujlel Dios jini Zacarías i tyat alʌl. Ti queji i yʌle' t'an tsa' bʌ aq'uenti ti Dios. Ti yʌlʌ:

⁶⁸La' lac sube' i ñuclel lac Yum i Dios israelon bʌ la como ti tyʌli i cotyañonla i cha'añon bʌ la.

⁶⁹Mux quejel i yʌq'ueñonla p'ʌtyʌl bʌ Ajcotyaya lac cha'an loq'uem bʌ ti jiñʌjlel David ajtroñel i cha'an Dios.

⁷⁰Chʌ'ʌch ti' wʌ subeyob Dios jini i cha'an bʌ tsa' bʌ i xiq'ui Dios c'ʌlʌ ti ñoj oniyix cha'an i subeñob lac yumob ti ñoj oniyix.

⁷¹Tsa'ix i wʌ alʌ Dios cha'an mi quejel i cotyañonla loq'uel ti' p'ʌtyʌlel laj contrajob pejtyelel jini mu' bʌ i ts'a'q'uelonla.

⁷²Dios ti' wʌ sube lac yumob ti ñoj oniyix mi quejel i p'untyañob cha'an yom i cotyañob. Mach'an mi quejel i ñajʌyel i cha'an Dios i t'an tsa' bʌ i wa'choco ti ñoj oniyix.

⁷³Jiñʌch jini tsa' bʌ i wʌ alʌ Dios che' ñac ti' xuc'choco i t'an yic'ot lac yumob ti oño'tan Abraham bʌ i c'aba' cha'an jini mu' bʌ quejel i yʌq'ueñonla.

⁷⁴Ti yʌlʌ: Mi quejel i loc'onla ti' p'ʌtyʌlel laj contrajob cha'an ma'ix lac bʌq'uen mi lac melben i troñel Dios

⁷⁵cha'an tyojʌch añonla yic'ot i cha'añonixla Dios c'ʌlʌ che' cuxulon tyo la wʌ' ti mulawil.

⁷⁶Zacarías ti bej alʌ: Jixcu jatyet, alʌl calobilet, mi quejel a pejcʌntyel ti mu' bʌ i xiq'ue' a wʌle' Dios, jiñʌch jini Dios mach'ʌ ba'an i p'isol i ñuclel. Como mi quejel a chajpʌben i bijlel lac Yum yubil mu' tyo bʌ quejel i tyʌlel.

⁷⁷Mi quejel a wʌq'ueñob i ch'ʌmeñob isujm i cha'año' bʌ israelob cha'an añʌch i cotyʌntyel yic'ot cha'an mi yubiñob añʌch i ñusʌntyel i mul.

⁷⁸Zacarías ti bej alʌ: Como lac Dios ti' wen p'untyʌyonla israelon bʌ la. Ti' q'uele ti p'ump'un cha'an yom i cotyañob. Ti loq'ui tyʌlel ti panchan wʌ' ba' añonla cha'an lac tyaje' laj cotyʌntyel.

⁷⁹Cha'an i yʌq'ueñob i q'uele' i sʌclel yubil jini chumulo' bʌ ti ic't'ojñal chʌncol bʌ i sajtyelob yubil yic'ot cha'an i pʌs'eñonla bajche' ch'ujbi la cajñel ti ñʌch'ʌl. Che' ti yʌlʌ Zacarías.