Kʋkɑlʋɣʋ 12:2-15

²Hɑlǝnɑ pɑ́ tɔ́ sɩ: Tɑcɑɑ yɔɣɔtǝɣǝnɑ tɑ́ tɔtɔɣɔ. Pǝ tɑɣɑ Moisi tike kɛ ɩ yɔɣɔtǝɣǝnɑ. Ɩlɛnɑ Ɩsɔ nɑ́ɑ́ nɩɩ-tɩ.

³Amɑ Moisi nɑ́ tɑ́ cɔ nɑtǝlɩ. Mpi tɔ, ɩ kɑ tɛɛwɑ ɑtɛ yǝlɑɑ tǝnɑɣɑ suulu kɛ́.

⁴Ḿpʋ́ɣʋ́ Tɑcɑɑ yɑɑ ɩ́ nɑ Alɔŋ nɑ Mɑlǝyɑm, nɑ pɑ́ suli cokǝle kiŋ.

⁵Nɑ ɩ́ tii ɩsɔŋmʋntʋɣʋ tɑɑ kɛ́ cokǝle nɔɣɔ. Nɑ ɩ́ yɑɑ Alɔŋ nɑ Mɑlǝyɑm nɑ pɑ nɑɑlɛ pɑ polo.

⁶Nɑ Tɑcɑɑ tɔ-wɛ sɩ: Ɩ́ nɩɩ mɑ kʋyɔɣɔtʋtʋ kɛ teu yoo. Ye mɑ kʋyɔɣɔtʋtʋ tɛlǝsǝlʋ ɩ́ wɛ mǝ hɛkʋ mɑ hʋlǝɣɩ-ɩ mɑ tǝɣɩ. Nɑ mɑ́ lɩɩkɩ ɩ tɔɔ nɑ mɑ yɔɣɔtǝɣǝnɑ-ɩ toosee tɑɑ.

⁷Amɑ mɑ yʋlʋ Moisi nɑ́ nɩɩnɑ-m teu kɛ́, nɑ ɩ́ lɑkɩ ɩ tǝmlɛ kɛ mɑ tǝyɑɣɑ tǝnɑ tɑɑ.

⁸Mɑ nɑ-ɩ tǝ yɔɣɔtǝɣǝnɑ tǝmɑɣɑ tǝcɛɩcɛɩ. Mɑ hʋlǝɣɩ-ɩ mɑ tɩ nɑ ɩ́ nɑɑkɩ mɑ wɛɛtʋ. Ɩlɛ pepe tɔɔ kɛ́ mǝ tɑ́ nyɑnɑ-ɩ, nɑ hɑlǝnɑ ɩ́ cɑɣɑnɑ-ɩ?

⁹Ḿpʋ́ɣʋ́ Tɑcɑɑ mʋ pɑ́ɑ́nɑ́ nɑ ɩ́ tɛɛ.

¹⁰Wɑɑtʋ wei ɩsɔŋmʋntʋɣʋ kɛɛlɑ cokǝle tɔɔ ɩlɛ, kʋtɔŋ ŋku kʋ pilisiɣi yʋlʋ tɔ kʋ wɑɑsɑ Mɑlǝyɑm tɔɔ kɛlɛ, nɑ ɩ́ hʋlʋmɑɑ tǝloiloi ɩsɩɩ kponkpomʋlʋm. Ḿpʋ́ɣʋ́ Alɔŋ nɑ́ mpʋ.

¹¹Ɩlɛnɑ ɩ́ tɔ Moisi sɩ: Hɑɩ, suulu Tɑcɑɑ, tɑ́ tɔm sǝpɑɣɑ. Ɩlɛ tɑɑ lɛɛtɩ-tʋɣʋ tɑ́ kʋmɛlɛntʋ sɑlǝkɑ.

¹²Mɑlǝyɑm ɩ́ tɑɑ wɛɛ ɩsɩɩ pǝyɑɣɑ sǝkʋɣʋ kɑ too lotu tɑɑ, nɑ pɑ́ lʋlɩ-kɛ nɑ kɑ tɔnʋɣʋ fetiliɣi ɩsǝnɑ tɔ.

¹³Tǝnɑɣɑlɛ Moisi wiinɑ Tɑcɑɑ sɩ: Hɑɩ, Tɑcɑɑ, Suulu, wɑɑsɩ.

¹⁴Ntɛnɑ Ɩsɔ sɩ: Ye ɩsɩɩ ɩ cɑɑ kɑ tɔwɑ ɩ ɩsɛntɑɑ kɛ́ ntɑɣɑmɑ, pǝ tɑɣɑ kʋyɑkʋ nɑ kʋ ɩsikile kɛ ɩ cɑkɩ fɛɛlɛ tɑɑ? Mpʋ tɔ, pǝ wɛɛ sɩ pɑ́ lǝsɩ-ɩ tǝsikile kɛ kʋyɑkʋ nɑ kʋ ɩsikile kɛ́. Pǝ wɑɑlɩ ɩlɛnɑ pɑ́ tɑɣɑnɩ-ɩ yɑɑʋ.

¹⁵Ḿpʋ́ɣʋ́ pɑ lǝsɑ Mɑlǝyɑm kɛ tǝsikile tɑɑ kɛ́ kʋyɑkʋ nɑ kʋ ɩsikile. Pɑ mǝlǝnɑ-ɩ tɔɣɔ Ɩsɛɣɛlɩ nyǝ́mɑ tʋ́ mpɑɑʋ.