Juan 17:13-24

¹³»Ekꞌu woꞌora kintzelej tanchi ukꞌ la. Pero xaloqꞌ kꞌa in kꞌo che ruwachulew, kambꞌiꞌij taq waꞌ chike chaꞌ lik kanoj ri kanimaꞌ che kiꞌkotemal, jelaꞌ pachaꞌ ri kiꞌkotemal kꞌo wukꞌ riꞌin.

¹⁴»Riꞌin nuyaꞌom ri Chꞌaꞌtem la chike. Yey taq ri winaq re ruwachulew tzel kekilo ma na junam ta kikꞌuꞌx kukꞌ, jelaꞌ pachaꞌ riꞌin na junam ta nukꞌuꞌx kukꞌ ri e re ruwachulew.

¹⁵Na e ta kꞌu kinelaj chiwach la chaꞌ kebꞌesaj la che ruwachulew, xew lik chechajij la chwach ritzel winaq.

¹⁶Rike na junam ta kikꞌuꞌx kukꞌ ri e re ruwachulew, jelaꞌ pachaꞌ riꞌin na junam ta nukꞌuꞌx kukꞌ ri e re ruwachulew.

¹⁷»Yaꞌa kꞌu la chike kebꞌin jusukꞌ chupa ri Qꞌijsaq e la, waꞌ e ri Chꞌaꞌtem la.

¹⁸Jelaꞌ pachaꞌ Rilal xintaq lo la chikixoꞌl ri tikawex che ruwachulew, jekꞌuriꞌlaꞌ riꞌin kebꞌenutaq bꞌi rike chikixoꞌl ri tikawex che ruwachulew.

¹⁹Y kuma kꞌu rike, lik nuyaꞌom wibꞌ riꞌin che uꞌanik ri rajawal kꞌuꞌx la, chaꞌ jelaꞌ rike kebꞌin jusukꞌ chupa ri Qꞌijsaq.

²⁰»Yey na xew tane kinelaj chiwach la pakiwi rike, ma e kantzꞌonoj cheꞌla pakiwi ri kꞌamajaꞌ kakikoj ri nubꞌiꞌ ruma kakita ri tzijonik kakiꞌan rike.

²¹Lal Nuqaw, kantzꞌonoj ko cheꞌla chuꞌana xa jun kikꞌuꞌx chikiwach junam qukꞌ riꞌoj, jelaꞌ pachaꞌ riꞌin ukꞌ la y Rilal wukꞌ riꞌin, chaꞌ ri e kꞌo che ruwachulew kakikojo e rilal taqayom lo la we riꞌin.

²²»Ri yakbꞌal nuqꞌij yaꞌom la chwe riꞌin, xinya chike rike chaꞌ chuꞌana xa jun kikꞌuꞌx jelaꞌ pachaꞌ Rilal y riꞌin xa jun qakꞌuꞌx.

²³Riꞌin in kꞌo kukꞌ rike y Rilal kꞌo la wukꞌ riꞌin chaꞌ rike kuꞌan xa jun kikꞌuꞌx pa saqil wi. Jekꞌulaꞌ riꞌ konoje ri tikawex che ruwachulew kaketaꞌmaj e Rilal taqayom lo la we riꞌin y lik kꞌax kenaꞌ la ri nutijoꞌn, jelaꞌ pachaꞌ lik kꞌax kinnaꞌ la riꞌin.

²⁴»Lal Nuqaw, e janipa ri eyaꞌom la panuqꞌabꞌ, e kuaj riꞌin kebꞌeꞌkꞌola wukꞌ pa kineꞌkꞌola wi, chaꞌ kakil ri yakbꞌal nuqꞌij yaꞌom la. Ma xex wi kꞌax innaꞌom lo la, chwi echiriꞌ kꞌamajaꞌ ne kajeqer ruwachulew.