Yohana 17:13-24

¹³Haluse neza kwako, nasilonga mbuli zino nichei mwe isi chani chinyemi changu chichinte mwe myoyo yawo.

¹⁴Miye siwenka ulosi wako, nawo wantu we isi wawehiwani, kwaviya sawo wantu we isi, saviya miye suyo ywe isi.

¹⁵Sikulombeza uwause mwe isi, mna nalombeza uwadime na yudya Mwavu Shetani.

¹⁶Wowo sawo we isi, saviya miye nami suyo ywe isi.

¹⁷Uwalenguse mwe chindedi, ulosi wako ni chindedi.

¹⁸Saviya unisigile mwe isi, miye nami siwasigila wowo mwe isi.

¹⁹Nelengusa mwenye chindedi kwako kwachausa chawo, chani wowo, nawo, welavye kwako.

²⁰“Sikuwalombezeza awo du, mna nawalombezeza wose nawanizumile kwa ulosi wawo.

²¹Nalombeza chani wose watende wamwenga. Tate! Nalombeza wekale mndani mwetu, saviya weye ukwikala mndani mwangu miye nami nekala mndani mwako. Nalombeza watende wamwenga, chani wantu we isi wazumile kugamba ni weye unisigile.

²²Miye siwenka ntunyo idya uninkile miye, chani watende wamwenga, saviya suwe chi wamwenga.

²³Miye mndani mwawo na weye mndani mwangu, chani umwenga wawo uchintise, wantu we isi wamanye kugamba weye nakunisigila naho kugamba wawaunga saviya ukununga miye.

²⁴“Tate! Naunga awo uninkile, naho naunga watende hamwenga namiye hantu hadya nili, chani wawone ntunyo yangu, ntunyo idya uninkile, kwaviya nakununga kukongela isi hainati kumbwa.