Yohanes 17:13-24

¹³Now Mi e kon na Yu, ma Mi e taki den sani disi dya na grontapu fu den kan furu srefsrefi nanga a prisiri fu Mi.

¹⁴Mi ferteri den san Yu ferteri Mi. Fu dat'ede den sma fu grontapu no man si den na ai, fu di den no de fu grontapu leki fa Mi no de fu grontapu.

¹⁵Mi no e begi fu Yu puru den na grontapu, ma fu Yu kibri den fu a ogriwan.

¹⁶Den no de fu grontapu, leki fa Mi no de fu grontapu.

¹⁷Den tru sani fu Yu mus meki den kon santa. Yu wortu tru.

¹⁸Leki fa Yu seni Mi kon na grontapu, na so Mi seni den go na den sma fu grontapu tu.

¹⁹Na fu den ede Mi e poti Misrefi aparti gi Yu, fu den srefi kan de aparti gi Yu trutru.

²⁰Mi no e begi gi den sma disi wawan, ma Mi e begi tu gi den sma di o teki bribi ini Mi te den sa ferteri den fu Mi.

²¹P'pa, meki den alamala de wan, soleki fa Yu de ini Mi, èn Mi de ini Yu. Meki tu tak' den sa de ini Wi, fu grontapu kan bribi tak' na Yu seni Mi kon.

²²Mi ben gi den a grani san Yu ben gi Mi, fu den kan de wan soleki fa Wi de wan.

²³Mi de wan nanga den, èn Yu de wan nanga Mi. Meki den de wan trutru. Dan grontapu sa sabi tak' na Yu seni Mi kon, èn tak' Yu lobi den soleki fa Yu lobi Mi.

²⁴Mi P'pa, Mi wani tak' den sma di Yu gi Mi sa de pe Mi de, fu den kan si a glori di Yu gi Mi. Bika Yu ben lobi Mi fosi grontapu ben meki.