JON 17:13-24

¹³“Kale kota niyo kapmi finang no tolon-temi kale, kafin diim kagal albi kota, weng bo bogobelita, nimi aget tem bilili age-bom deng taban-nuubi kalutap ke-bom-nilipta, igil imi aget tem uyo bilili age-bom deng so ifup so uta kup ke-bom-nilipta o ageta ko.

¹⁴“Niyo tinum kalip iyo kapmi weng uyo kafalebeli utam-nilip e, tinangku waafusip ko. Niyo kafin diim tinum ba kale, niyo tip tinum kale, bilip igil mungkup tip tinum kebip kalaa age-nilipta, kafin diim kasel bilip iyo olsak kupka-e-bilip ko.

¹⁵Niyo, kafin diim uyo imkan kelal o aganbaali kale, Tinum Mafagim ita tebe ifak daa-nama kale, niyo dagalita, kapta tebe daam fogo imam daalapta, kaal binim, tambaliim kup bom-bilipta o ageta ko.

¹⁶Niyo kafin diim komi tinum ba e minte, kalip igil kafin diim komi tinum ba no kale,

¹⁷kapmi weng uyo atin fen kale, kapmi weng uyo kwep imi aget tem, dubom tem daabelapta, mitam kapmi tinum miit aligaap kepkelin o ageta ko.

¹⁸Siin uyo nimi nimdalap ti-sii uyo, tal kafin diim unang tinum imi iibak tem e ti-sii kale, ulutap kale, okumop man kalip iyo nagal imdali kafin diim komi unang tinum imi iibak tem kweng-tele unon-temip kale,

¹⁹niyo, bilip imi ilak o ageta dital fagaa kaan-nilita, ilim bobelan o agan-bii kale, ilim bobelita, igil dital faga-nilipta, kapmi man aligaap kepkelin o age-nilita, kaanan-temi o,” age Yesus iyo agan-kala ko.

²⁰Kale Yesus iyo beten ke-bom bogo-nala e, “Niyo, okumop man kalip ita kup beten kebelan o aganbaali kale, niyo nimi beten kebelan-temi boyo ki, unang tinum nimi sang kwep yang baga-e-bilip tolong do-nilip mitam nimi ilak dugaman-temip iso beten kebelan o ageta ko.

²¹Kale ulim maagup ke-bom aget maagup bubul maagup kesupta, ti-sii kale, ulutap kale, unang tinum nimi ilak dobip igil mungkup ulim nulutap ke aget maagup bubul maagup kebe no kebelipta, kafin diim komi unang tinum iyo imi kuguup tambal uyo utamipta e, aafentap Aatum kapkal nimdalap ti-sii kalaa agelin o ageta ko.

²²Kale kapmi om kun kopnesap bota nagal mungkup kobe no kelita, mangkal ninggil maagup nan-temup uyo ki, kapso niso ulim maagup aget maagup bubul maagup ke-bomup ulutap kelipta o ageta ko.

²³Kale suun kup kabo nimi diim kal nap e minte, nagal bilip imi diim kal ni no ke-bomup kale, iyo aget maagup bubul maagup kebelipta, kafin diim komi unang tinum iyo utamipta e, kapkal nimdalap ti-sii kalaa kage-nilip e minte, utamipta e, kapmi nimi aget kopnesap ulutap kebe-nalapta, unang tinum nimi ilak dobip bilip imi aget kobebap no kalaa agelin o ageta ko.

²⁴“Aatum kabaa. Nimi aget fugunin uyo ki, unang tinum ulaa imdupnesap bilip iyo nimi nan-temi boyo igil niso nin o agan-bii kale, kanube sugamiyok uyo kafin uyo telela kolin-tem ke-bom-nalap uyo, nimi aget uyo fomtuup kopne-nalap e minte, kapmi om kun uyo kopnesap no kale, nimi aget fugun-bii uyo, bilip iyo nimi titil tebesi so dong kefosi so boyo utamin o agan-bii no ko.