Johanningundru 17:13-24

¹³Karari ngani jinkangu wokarai, ja tananapini ngato mitani kaukaubai, ngangau tanalia ngakani mankini tanangu muntali manamiri ngamalkananto.

¹⁴Ngato tanangu jaura jinkani jinkina warai, ja mitalali tanangu kalakalarina warai, ngangau tanaia wata mitandru nganai, worderu bakana ngani wata mitandru nganai.

¹⁵Ngani wata ngatjiai, jundru tananaia mitandru maninanto, a-ai, jundru tananaia kulkananto Madlentjani.

¹⁶Tanaia wata mitandru nganai, worderu ngani wata mitandru nganai.

¹⁷Morlalulali jinkanali tananaia kulikiri ngankamai; jaura jinkani morlalu nganai.

¹⁸Worderu jundru ngana mitaia jinpanala, jeruja bakana ngato tananaia mitani jinpana warai.

¹⁹Ja ngani munta kulikiri ngankateriai tanangu, ngangau bakana tanaia kulikiri nganananto morlalulani.

²⁰Wata windri tanangupini ngani ngatjiai, a-ai, bakana tanngu, tanali jaurali tananali morlalu ngundrai ngakangu.

²¹Ngangau pratjana kulnukulnuni nganananto, worderu jidni, Ngaperiai, ngakangu, ja ngani jinkangu, ngangau tana ngaldrangu kulnukulnuni nganananto; ngangau mitalali morlalu ngundrananto jundru ngana jinpanala.

²²Ja ngato ninapini pirnala, ninaia jundru ngakangu jinkinala, tanangu jinkina warai, ngangau tana kulnukulnuni nganananto, worderu ngaldra kulnukulnuni nganai.

²³Ngani tanangu ja jidni ngakangu, ngangau tana morlalu nganananto kulnukulnuni, ja ngangau mitalali ngujamananto jundru ngana jinpanala, ja jundru tanana ngantjanala, worderu jundru ngana ngantjanala.

²⁴Ngaperiai! Ngato ngantjai, woderi ngani nganai, naka bakana tana nganananto ngakangunto, tanana jundru ngakangu jinkina warai; ngangau tanali pirnala ngakani, ninapini jundru ngakangu jinkinala, najinanto, ngangau jundru ngana ngantjana wonti morla ngopera windrila mita pantjimala.