Jon 17:13-24

¹³“Megi ena nage pageba asobao. Tama eno te po e tǫde nage dali obao, te eno dwagi yai homu eno bidi dabe augwalide pągąnalumainogo augwali dwagi yai homu mu emainogo ebao.

¹⁴Nago po eno augwalibolo mawai dao. Tama tǫde we bidigo augwali dali boi bidi gagawai dao. Ena da e tǫde bidi menio. Te tiwai augwali me e tǫde bidi menio. Tama tibaso, tǫde we bidigo augwali dali boi bidi gagawai dao.

¹⁵Tama eno e po nage dali weyu, eno nage augwali te tǫde bidibo tagalomainogo hanalu wabeo. Te meni. Nago augwali bugagia tonalumainogo eno te po nagebolo obao, tama te dwai bidi Satan agai augwali dolidali weyu, eno e po nagebolo obao.

¹⁶Ena da e tǫde bidi menio. Te tiwai augwali me e tǫde bidi menio.

¹⁷Tama tibaso, naga digi nago mu po augwalibolo ola mao, augwali gasagi yai tedali bidi dabe bidimainogo, magi sę isiąwai bidi dabe bidimainogo yao.

¹⁸Tama polobadu nago ena tǫba tagala palama, tama ena augwali tǫde we bidi tomode bidai. Te tama tiwai eno e bidi dabe me tagala palama, augwali te tǫde we bidi tomode bidigi pali.

¹⁹Tama eno augwali tobade tau siyu, ena digi ena bidabo ula tagalama, nago po wali peyu, ena isaibao. Tama po mu wabogo augwali nago bidi hani mu bidimainao,” Jisasgo te po wai.

²⁰“Te nago augwali naga tau somainogo eno nage dali e po wabeo. Menio. Nosali augwaligo gasa we bidibolo eno po ola mayu, tama te po odobo we bidi augwaligo augwa homu enaba muaibao. Tama te tibo we bidi augwali tobade me tau siyu, tama eno megi nage dali e po obao,

²¹augwali tigidali deli homu naga elama bidimainogo ebao. Aya, nage ena dali wadoloyu, tama ena nage dali wadoloyu bidibo tiwai, eno homugo augwali da si dali homu deli elama, wadoloyu bidimaio. Tama te tiwai elama, tama tǫde we bidi augwaligo te nago ena e tǫba tagala palali po odama, tama augwaligo te mu po dao olama, koneagameo. Tama te sę pedalomainogo, eno e po nage dali megi obao.

²²Nago enabolo te bomo mani, te bomo eno augwalibolo manio, augwali deli homu elama, bidimainogo, dadi si deli homu elama bidibo tiwai, augwali me te deli homu elama bidimainogo eno te bomo augwalibolo mani.

²³Ena e bidi dabe augwali dali bidiyu, tama nage ena dali bidiyu yai, tama tiwai eno homugo augwali me deli homu elama, bidimainao. Tama tiyu, te tǫde we bidi augwaligo koneaibao, nago ena tagala palama, ena asai. Te me augwaligo koneaibao, te nago ena godolo mu ebogia, nago e bidi dabe me godolo mu ebo dao,” Jisasgo te po wai.

²⁴“Aya, eno homugo nago ena mani bidi dabe augwali ena bidibo bulude ena dali da hodobo nosali bidaio, augwaligo eno bomo yai ula dali bomo dali sumainogo yaibao. Polobadu, te tǫ pedalisiąbadi, te sogo nago ena godolo mu eyu, tama nago te bomo yai ula dali te bomo dali enabolo mawai dao.