Jon 17:13-24

¹³Na len dah jo ewek hawem, arile jo udu ndra kon munyak kahis, jo asehek iri lakou dah ili toro, ta sekesek tek tinan kirek ndrine oro.

¹⁴“Jo ndrasihidi iri sahou tam marakon ndrala toro, ano iri lau badu kon munyak baso-ok oro ja bwe. Tasah oro badu kon munyak bwe, i buku jo ale badu kon munyak dah bwe le.

¹⁵Jo bandremenya ou ta andrei oro ado kon munyak au bwe, arile jo ndremenya ou ta tondrokei oro kare ndra len ta ndramak ndra-in balik.

¹⁶I buku le jo badu kon munyak dah bwe, oro ale badu kon munyak dah bwe.

¹⁷Sahou tam handru. Jo aso-ok ou atehei sahou tam handru kamekes gok kili bolo ndrine oro ma kabwidi oro kameh kasahan oro lau tam handru.

¹⁸Jo suni oro ta ala bolo kon munyak, i buku le ou mene suni jo eme andri kon munyak.

¹⁹Jo anya kaseben oro, eme ma jo atehei jo mara-ei ewek tam, ta oro katehei oro mara-ei kewek tam, ma ta oro kameh asahan oro lau tam handru.

²⁰“Tama, jo basolom toro le lau nane ado hawek kada-ah bwe, arile ta are lau kameh iy atehei budon tan ale in tek, tasah ta sahou tam oro kameh asehek.

²¹Jo asolom ta oro kala le ari. Tama, oro kare hawe talu, i buku le ou ado hawek, ma jo udu hawem. Oro kasahan ari le, ta iri lau badu kon munyak kameh anyolom ma atehei budon tiri ewek tam, ta ou suni jo eme.

²²Jo ndratehei lomadam ndrala toro. Lomadam doh mene ou adeu eme tek, ta oro kameh kasahan ka le ari, buku talu ma la-uh badeh, ari le.

²³“Jo udu hawe oro, ya ou ado hawek. Jo aso-ok oro kasahan ari buruwen, ta iri lau badu kon munyak kanyolom ma iri katanan, ta ou suni jo eme. Ma iri ale katanan ta ou aso-ok oro, i buku le ou aso-ok jo tinan labai.

²⁴“Tama! Ou ndratehei oro ndrame tek, eme jo aso-ok oro kame kare hawek, kare kon kameh jo udu aliy. Ma jo aso-ok oro kanyolom lomadak mene ou adeu eme tek, tasah ou aso-ok jo bwena labai, ano kon munyak barasahan.