Johannes 17:13-24

¹³Iwe, iei üpwe feila reöm. Üa kapas usun ekei mettoch lupwen üa chüen nom lon fanüfan, pwe repwe eäni unusen ai we pwapwa lon leluker.

¹⁴Üa ngeniir om kapas, nge fanüfan a oputeer, pun ir resap pop seni ei fanüfan, usun chök ngang üsap pop seni ei fanüfan.

¹⁵Üsap tüngor pwe kopwe angeer seni lon ei fanüfan, nge üa tüngor pwe kopwe tümwünüür seni ewe Eman mi Ngau.

¹⁶Usun ngang üsap pop seni ei fanüfan, iei usun ir resap pop seni ei fanüfan.

¹⁷Kopwe apiniir lon ewe let. Om kapas a let.

¹⁸Usun en ka tinieilong lon fanüfan, iei usun pwal ngang üa tiniirela won fanüfan.

¹⁹Iwe, üa püsin apiniei fänäsengesiir, pwe pwal ir repwe pin lon let.

²⁰Nge üsap chök iotek fän iter, pwe üa pwal iotek fän iten chokewe mi lüküei ren ar afalafal.

²¹Semei, üa iotek pwe ir meinisin repwe eu chök. Usun chök en ka nonom loi, nge ngang üa nonom lomw, iei usun ir repwe nonom loch, pwe fanüfan epwe lükü pwe en ka tinieito.

²²Ngang üa ngeniir ewe ling en ka ngeniei, pwe repwe eu chök usun kich sa eu:

²³Ngang üa nonom lor o en ka nonom loi, pwe ar eufengen epwe unus, pwe fanüfan epwe silei pwe en ka tinieito, epwe pwal silei pwe en ka echeniir usun ka echeniei.

²⁴Semei, üa mochen pwe chokewe ka ngeniei repwe nonom rei ia ngang üpwe nom ie, pwe repwe nenengeni ai we ling ka fen ngeniei, pun ka echeniei mwen fanüfan esamwo wor.