YOHAAN 17:13-24

¹³Hili shwane/ aha/ yakina iya i /e mo, dhali gwo gwansan ṯorkika/ ’kwaniny’cesh mo ki uni mina bwa ’kuny mo mmo’tu’d uni ki is buni mo.

¹⁴Aha/ c̱ikina uni gwom pini mo dhali ’kwaniny’cesh shi/ki uni i e mo haali/ uni ’koki ta ku gi mony’cesh mo, isi me’dyin dika/ ki ta ji gi mony’cesh mo be.

¹⁵Aha/ dinaki ’tho ki /e mini ’taki bu’th uni ’peni mony’cesh mo, hili ki /e mini ’taki dhu uni ’peni a’din thus ’deyin mo.

¹⁶Uni ’koki ta ku gi mony’cesh mo, isi me’dyin dika/ ki ta ji gi mony’cesh mo be.

¹⁷Dhagami uni ki gwoŋ gana/ mo. Gwom pini ita gwoŋ gana/ mo be.

¹⁸Me’d jin hashkina /e aha/ i mony’cesh mo tani wakan si’da/ aha/ hashkina uni mo e mony’cesh mo be.

¹⁹Dhali gom gway buni mo tani aha/ dhagamkina is pem mo, ki uni si’da/ minu dhagam e gwoŋ gana/ mo be.

²⁰Aha/ dinaki ’tho gom uni gwansan uni ’cena mo, hili si’da/ gom uni gwansan kun mini gam aha/ gwo is i’ko’d mo e gwom buni mo be,

²¹ki uni ’baar mo mini ṯal ’de/ mo, isi me’dyin /e jin tana Baba dikin e aha/ mo, dhali aha/ e /e mo, ki uni si’da/ mini ’ko e ana mo, wakan ki ’kwaniny’cesh mini gam gwo is ki /e hashki aha/ mo be.

²²Dhali monyca yin jin c̱ikina /e aha/ mo tani aha/ c̱ikina uni a’di mo ki uni mini ṯal ’de/ mo isi me’d ana mmoṯala ana ’de/ mo be.

²³Aha/ e uni mo dhali /e e aha/ mo ki uni minu gam is ki gam gana/ mmonṯal ’de/ mo, wakan ki ’kwaniny’cesh mini mish ki /e a’di ihashki aha/ mo dhali /e enki uni mo isi me’dyin jin enkina /e aha/ mo be.

²⁴Ababa, aha/ ona bwa si’dayi ki uni gwansan kun c̱ikina /e aha/ mo mini nyaḵ ’ko ki aha/ mo e mo yin jin miga/ di mo, mmop̱ar monycam pem e mo, a’di jin c̱ikina /e aha/ mo ki mo/en pini gom aha/ mo nṯwa/a/ ki mony’cesh yan dinuki ḵa’b mo be.