John 17:13-24

¹³Akngeyay! Lyert-antey ayeng alpetyek ngkweng-warl. Ayeng ngkweng-warl angkeyel ahern nhel, kwertengerl atyenh-rnemel ayenh awetyek, rernem atyeng inkwerelhetyek, irrngerney anetyek arrpemarl.

¹⁴Atha renh-rnem akalty-anthek angka ngkwenh. Ingwer-rnem ahern nhenh-areny-rnem, apmwangkwarr apenteyel-rnem, rernem kwertengerl-rnem-kety arlkarirreyel. Ayeng ahern-arenyek awelhey-angenh, rernem ahern-arenyek awelhey-angenh arrpemarl, arrangkw.

¹⁵Akngeyay, atha ngenh ayerneyel, rernem ahern nhenhel anayntetyek, ntwa renh-rnem arntarnt-aretyek arrenty-kety.

¹⁶Atha ahern-areny-kenh-angkwarr apentey-angenh arrangkw. Rernem ahern-areny-angkwarr apentey-angenh arrpemarl.

¹⁷Angka ngkwenh arraty inngarl. Kwertengerl-rnem rlterrkila, rernem ngkwengant arraty anayntetyek intem-antey.

¹⁸Ntwa ayenh ahern nhenh-warl thwenek, alakenh-anyem atha nhenh-rnem thwenem, rernem angka mwerr ilerl-apayntetyek apmer arrpanenh-warl.

¹⁹Ayeng arlka menty anthelhem ikwer-rnem, rernem ngkweng anthelhetyek arrpemarl, impen-angkwarr.

²⁰Akngey, atha kwertengerl atyenh-rnemek ayerneyel. Rernem angka atyenh ilerl-apayntetyek ingwer-rnem-warl. Ingwer-rnem arntarnt-araynta arrpemarl, rernem ngkweng-angkwarr apenterl-ayntetyek arrpemarl.

²¹Akngey, atha ngenh ayerneyel, rernem anyent-angkwarr apenterl-ayntetyek ingkerr aylak anyent-antey aneyel-apeny. Ingkerrenhel renh-rnem awetyek, rernem ngenh iterl-aretyek, ntwarl ayenh thwenek ahern nhenh-warl.

²²Akngey, ntwa ayenh rlterrkilek. Alakenh-anyem atha renh-rnem rlterrkilem arrpemarl. Alakenh-anyem rernem anyent-angkwarr anetyek, mwerrant-arey, aylak anyent-angkwarr aneyel-apeny.

²³Akngey, ayeng ikwer-rnem-itwel intem-antey anem, nga atyeng-itwel intem-antey aneyel-apeny. Alakenh-anyem rernem anyent-antey aneyenh. Rernem ngenh iterl-aretyek, ntwarl ayenh thwenek, ahern nhenh-warl, ngarl ikwer-rnem ilkelheyel, atyeng ilkelheyel-apeny.

²⁴Ahern nhenh arrpmerney-angenh-antey, nga atyeng artewentyel ilkelhenh. Alakenh-anyem ntwa ayenh rlterrk anthek. Akngeyay, ntwa ayenh kwertengerl-rnem atyeng-warl atnwenhek. Ayeng ilkelheyel, rernem atyeng-itwek anetyek intem-antey, atyeng akalty irretyek, ayeng rlterrk ilkwakert, ngarl rlterrk aneyel-apeny.