ᤕᤢᤜᤢᤴᤏᤠ 17:13-24

¹³ᤀᤠᤸᤗ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤌᤠᤱᤅᤠᤖ ᤐᤳᤋᤠᤖᤥ॥ ᤀᤡᤱᤃᤠ᤹ ᤁᤳᤋᤢᤱᤒᤠ ᤀᤠᤕᤠᤶᤏᤠ᤺ᤶᤔᤡᤴ ᤂᤧᤱᤜᤠ᤹ᤖᤧᤀᤠᤱ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤠ᤹ᤀᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥

¹⁴ᤂᤧᤱᤜᤠ᤹ ᤐᤣᤗᤡᤃᤧᤴ ᤁᤧᤒᤠ᤺ᤴᤈᤠᤰᤜᤠ᤹ ᤐᤡᤖᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ॥ ᤀᤡᤱᤃᤠ᤹ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤇᤡᤒᤠᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤈᤡ᤺ᤳᤋᤢᤛᤡᤖᤥ॥

¹⁵ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤋᤣ᤹ᤖᤧᤛᤧ᤹ ᤑᤠ᤹ᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥ᤺ᤰᤁᤠᤴ. ᤁᤖ ᤁᤢ᤹ᤀᤡᤃᤧᤓᤧ᤹ᤒᤠ ᤔᤠᤑᤧᤴᤛᤠᤶᤔᤥᤗᤠᤶ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤧᤛᤧ᤹ᤀᤥ॥

¹⁶ᤀᤡᤱᤃᤠ᤹ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤇᤡᤖᤥ॥

¹⁷ᤂᤧᤱᤜᤠ᤹ ᤛᤧᤰᤂᤠ᤺ᤸᤗᤧ ᤛᤣᤛᤣ ᤛᤠᤱᤛᤠᤱ ᤆᤥᤃᤧᤛᤧ᤹ᤀᤥ॥ ᤂᤧᤏᤧ᤹ ᤐᤣᤗᤡᤃᤧᤴ ᤁᤧᤒᤠ᤺ᤴᤈᤠᤰᤁᤡᤱᤃ ᤛᤧᤰᤂᤠᤖᤥ॥

¹⁸ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤁᤢᤀᤡᤛᤡ᤺ᤰᤁᤣ ᤀᤡᤱᤃᤠ᤹ᤀᤠᤱ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢᤱᤛᤡᤱᤗᤥ॥

¹⁹ᤂᤧᤱᤜᤠ᤹ ᤛᤧᤰᤂᤠᤀᤣ ᤛᤣᤛᤣ ᤛᤠᤱᤛᤠᤱ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤛᤣᤛᤣ ᤛᤠᤱᤛᤠᤱ ᤆᤥ᤺ᤰᤛᤡᤱᤅᤠᤖᤥ॥

²⁰ᤀᤡᤱᤃᤠ᤹ᤃ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤖᤰ ᤔᤧ᤺ᤴ. ᤁᤖ ᤂᤧᤱᤜᤠ᤹ᤖᤧ ᤀᤡᤱᤓᤴ ᤔᤧᤈᤥᤃᤢᤒᤠᤗᤠᤶ ᤀᤡᤱᤃᤠ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥

²¹ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤱᤜᤠ᤹ ᤁᤠᤰ ᤌᤡᤰᤜᤢᤵ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤀᤠᤱ ᤀᤠᤴᤇᤡ᤹ᤀᤥ ᤔᤧᤘᤠ᤹ᤖᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤑᤠ᤹ᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤖᤖᤥ॥

²²ᤀᤠᤴᤇᤡ᤹ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤒᤡᤖᤠᤱᤒᤠ ᤔᤡᤔᤡᤍᤡᤱᤅᤡᤴ ᤂᤧᤱᤜᤠ᤹ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥

²³ᤀᤡᤱᤃᤠ᤹ ᤂᤧᤱᤜᤠ᤹ᤏᤢ ᤌᤡᤰᤜᤢᤵ ᤘᤠ᤹ᤀᤠᤒᤠ ᤁᤢᤀᤡᤛᤡ᤺ᤰ ᤜᤧᤰᤁᤩᤠᤱ ᤂᤧᤏᤧ᤹ ᤀᤡᤱᤃᤠ᤹ᤏᤢ ᤌᤡᤰᤜᤢᤵ ᤁᤧᤘᤠ᤹ᤒᤠ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤁᤢᤈᤧᤰ ᤌᤡᤰᤜᤢᤵᤐᤥ ᤔᤧᤍᤠᤖᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤏᤢ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ॥

²⁴ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤱᤃᤠ᤹ ᤁᤧᤒᤡᤖᤠᤱᤒᤠᤜᤠ᤹ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤔᤧᤘᤠ᤹ᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤡᤖᤠᤱᤒᤠ ᤔᤡᤔᤡᤍᤡᤱᤅᤡᤴ ᤔᤧᤏᤡ᤺ᤛᤢ᤹ᤖᤥ॥ ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤡᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤡᤔᤡᤍᤡᤱᤅᤡᤴ ᤁᤧᤒᤡᤖᤠᤱᤗᤥ॥