Yohanis 17:13-24

¹³Hatematak ia, Au sangga fali uni Ama uu. Au afada dedeꞌa kala ia, neu ledoeik Au bei nai daebafok ia. No leondiak, Au hataholi nggala dale nala bisa lamahoko lakandoo, sama leo Au daleng namahoko.

¹⁴Au afada Ama Dedeꞌa-kokolan neu sala so. Hataholi feꞌek malai daebafok ia, husembuluk leu Au hataholi nggala, huu Au hataholi nggala taa lasoda sama leo sila. Au boe oo, leondiak, huu Au taa sama leo hataholi feꞌek nai daebafok ia.

¹⁵Mete ma Au hule-haladoi na, Au taa oke fo Ama noo sala kalua leme doidoso nai daebafok ia mai. Taa! Tehuu Au oke fo Ama manea sala, fo ala dook leme dedeꞌa manggalauk mai.

¹⁶Sila taa sama leo hataholi feꞌek lai daebafok ia, sama leo Au boe oo, taa sama leo hataholi feꞌek nai daebafok ia.

¹⁷Pake hata fo ndoos suek tao dale nala malalaok. Huu Ama Dedeꞌa-kokola nala ndoos.

¹⁸Ama ndia nadenu Au uni daebafok ia mai. Basa de Au boe oo adenu sala leondiak fo suek ala lasoda lakambela lai hataholi daebafok kala lalada nala.

¹⁹Au anea Au aong fo malalaok akandoo neu Ama. No leondiak, Au hataholi nggala boe, lanea ao nala fo malalaok lakandoo soaneu Ama. Huu Ama Dedeꞌa-kokolan ndoos, tao nala sala fee aoina katematua nala leu Ama.”

²⁰Yesus hule-haladoi nakadaik nae, “Au hule-haladoi taa kada neu sala fo malai hatematak ia. Huu Au boe oo hule-haladoi neu hataholi la fo dei fo lamahele leu Au, huu Au ana mana tungga nggala kokola nala.

²¹Ama. Au oke fo sila basa sala bisa nana mbaꞌak neu esa, sama leo Ita boe nana mbaꞌak teu esa. Au boe oo nau fo ala nana mbaꞌak dadik esa lo Ita, fo suek hataholi feꞌe kala malai daebafok ia, bisa lamahele lae, Ama mesa kana nadenu Au so.

²²Ama natudu Au koasa inahuung neu hataholi la so. Boe ma Au soꞌu dema-dema kasa so, sama leo Ama soꞌu dema-demak Au. No leondiak, ala nana mbaꞌak dadik leu esa, sama leo Ita nana mbaꞌak teu esa boe.

²³Au nana mbaꞌak ua sala. Amak boe oo nana mbaꞌak no Au. Ala musi nana mbaꞌak dadik esa leondiak, losa ala lasoda dalek esa tebe-tebe. Huu mete ma ala lasoda dalek esa leondiak, na, hataholi feꞌe kala lai daebafok ia dei fo bisa bubuluk lae, Amak sue sala, sama leo Amak sue Au. No leondiak sila boe oo bubuluk lae, Amak ndia nadenu Au.

²⁴Ama. Au ahiik fo basa hataholi la fo Ama fee sala leu Au ndia, sama-sama lo Au. Huu Au nau fo ala bisa lita Ama soꞌu dema-demak Au. Huu memak Ama sue Au so, neu faik fo Ita bei ta takadadadik daebafok ia.