Yowane 17:13-24

¹³Yau meta ya laolaowa kalimwai, na sola tanoubu ta unai ma miyagu, na teina nuwatu ta ya hedededi kalidiwai, na bena yogu gwauyalalakilaki unai se miya.

¹⁴Yau yom hedehedede wa ya mosediko kalidiwai, na tanoubu tamowaidi meta siya se subudi, matawuwuna siya nige tanoubu ta yona doha yau nige tanoubu ta yona.

¹⁵Yau nige ya kaibwadaigo bena tanoubu ta unai ku haigabaedi, na ya kaibwadaigo bena tauyababa yona gigibwali unai kowa ku lauguduguduidi.

¹⁶Siya nige tanoubu ta yona, doha yau nige tanoubu ta yona.

¹⁷Yom hedehedede mamohoina unai ku hemwayaunamwanamwaedi, unai bena siya yodi mauli se mosegabaeimamohoiyedi kalimwai.

¹⁸Na kowa meta ku hetamaligau ya dobima tanoubu ta, unai yau hinage ya hetamalidi se lau tanoubu ta unai.

¹⁹Siya debadiwai ede yau ya mosegabaeiꞌuyoigau kowa kalimwai, unai bena siya kabo hinage se mosegabaeiꞌuyoidi kowa Yaubada Mamohoina kalimwai.

²⁰Tamagu, yogu kaibwada ta nige yogu hekahekatao se bom hesabadi, na hinage wasa ta yodi hewasana unai na kaiteyadi se kawamamohoiyeigau meta yodi ya kaibwada.

²¹Na ya kaibwadaigo meta maudoidi kabo se nuwakesega, doha kowa ede kaliguwai yo yau ede kalimwai. Siya hinage bena kalidawai, unai tanoubu maudoidi kabo se kawamamohoi meta kowa ku hetamaligauma.

²²Yogu kabaloina saesaena gigibwalina maudoina ku haiyama wa ya hekawalaei kalidiwai. Tenem unai bena siya se nuwakesega doha kita meta kesega.

²³Ede yau kalidiwai yo kowa ede kaliguwai. Taba siya se nuwakesegamamohoi, na unai bena tanoubu maudoina kabina se kata meta kowa ku hetamaligauma, yo ku gadosisiyedi gonogonowana doha yau ku gadosisiyeigau.

²⁴Tamagu, ya henuwa bena tamowai ku ledima wa maidaguwao yogu kabamiya ne unai, to yogu kabaloina saesaena wa se kita. Yogu kabaloina saesaena wa ku leyama, matawuwuna ku gadosisibagunaegau na kabo tanoubu ta ye tubu.