Jon 17:13-24

¹³Topoꞌe tukwini ŋam matme nin pe, ŋam manange wusyep eꞌe malme nin, ŋaiye teter ŋam marp kekep. Taꞌe luku pe, hriphrip ŋam ka paparar supule el oto ŋoihmbwaip meleꞌe tinge.

¹⁴Wusyep nin ŋam si mana lenge jetalah ŋaiye nin pwale. Taꞌe luku ti, lenge miyeꞌ tuweinge lalme gah kekep, tinge yende wachaihme lenge jetalah. Detale, lenge miyeꞌ tuweinge ŋaiye ŋam pe, tinge yukur miyeꞌ tuweinge tikin kekep eꞌe. Ki ŋahilyeh taꞌe ŋam yukur miyeꞌ tikin kekep eꞌe, pakai.

¹⁵Ŋam yukur manange wusyep misilih nin, ŋaiye na ginyen lenge angaꞌme kekep eꞌe. Kom ŋam manange wusyep misilih nin, ŋaiye na bepsime tinge bworerme ŋaiye miyeꞌ pupwa yukur ka se ende yumbune tinge.

¹⁶Ki ŋahilyeh taꞌe ŋam yukur tikin kekep eꞌe. Topoꞌe tinge yukur tikin kekep eꞌe.

¹⁷Wusyep nin ki bwore mise supule. Taꞌe luku pe, na ende wusyep mise nin uku, ka ende wah oto ŋoihmbwaip tinge pe, lenge miyeꞌ tuweinge nin uku ka yurp holi bwore mise supule.

¹⁸Ŋam member lenge mal kekep lalme ŋahilyeh, taꞌe ŋaiye nin nember ŋam nate gah kekep.

¹⁹Ŋam maŋaꞌe ŋam tanam malme nin supule. Taꞌe luku pe, tinge topoꞌe ka yaŋaꞌe tititinge yilme nin ŋaiye ka yurp holi bwore mise supule.

²⁰Ŋam yukur manange wusyep misilihme nin, ŋaiye na ungwisme lenge miyeꞌ tuweinge luku ŋilyehme, pakai. Kom ŋam manange wusyep misilih nin, ŋaiye na ungwis lenge miyeꞌ tuweinge ŋaiye mindemboi ka yisyunde wusyep lenge jetalah no, ŋoihmbwaip tinge ka teŋeime ŋam.

²¹Ŋam manange wusyep misilih nin, ŋaiye tinge lalme luku ka yurp ŋoihmbwaip ilyeh. Ki taꞌe ŋaiye nin Yai narp ŋoto ŋam, topoꞌe ŋam marp moto nin. Topoꞌe ŋam masande ŋaiye tinge ka yurp yoto poi berei. Taꞌe luku pe, ŋoihmbwaip lenge miyeꞌ tuweinge lalme tikin kekep ka teŋeime nin, ŋaiye ni nember ŋam mat.

²²Ŋam mangang lenge naŋ embere, topoꞌe bongol ilyeh uku, ŋaiye nin si pwale ŋam no, tinge ka ŋoihmbwaip ilyeh tuꞌe ŋaiye poi berei ŋoihmbwaip ilyeh.

²³Ŋam marp moto tinge pe, nin narp ŋoto ŋam. Ka yende tuꞌe luku no, ka ŋoihmbwaip ilyeh supule. Taꞌe luku pe, lenge miyeꞌ tuweinge lalme ŋaiye yarp kekep, ka sisyeme nange nin nember ŋam mat. Topoꞌe nin ŋende nihararme tinge ŋahilyeh taꞌe ŋaiye nin ŋende nihararme ŋam.

²⁴Yai, lenge miyeꞌ tuweinge ŋaiye nin si pwale ŋam pe, ŋam masande ŋaiye ka yotop ŋam yurp moi uku, ŋaiye ŋam mala murp no, ka yetekeꞌe yirise bongol embere, topoꞌe naŋ embere ŋam, ŋaiye nin si pwale. Detale, nin si ŋende nihararme ŋam yer ti, kekep nate sai.