Jon 17:13-24

¹³Qilaqa ija hinaca tige bili odigina. Odimig ija wawi ceeli bilec ageca ligiannu, age wawaga ceeli bilec ihoc bahic ligiannu je i mahana tatawi mahigina,” don.

¹⁴“Ija hinana je adem. Ija mahanadec qeewe eu odi ageha mahanadec qee. Eunu age mahanadec qeenu mahanadec eundec age sagagadegina.

¹⁵Ija hina, age mahana biluwainnu cedadaga ec qee inonhelem qa hina qisol mec dana eu ageca hu waadeiaunnu hewadagale higina.

¹⁶Ija mahanadec qeewe eu odi age mahanadec qee.

¹⁷Hinana je eu mele bahic. Eunu hina hinana jena hinanu qaguadaga.

¹⁸Hina ija mahana necnu sultemwe eu odi ija ageha mahamaha beloqagannu suladem.

¹⁹Age mele jena hinanu qagu biluqagannu ija ijadodoc hinanu qagugina,” don.

²⁰Jisas haun inondon: “Ija age qila ene tawegina agenu himec qee inonhigina. Euqa hibna age je maadecebil dana filfil ijanu wawaga meleigian eundecnu ha inonhigina.

²¹Mei, hina ija dunuhna biligina, ija hina dunuhna biliginawe eu odi age ele dunuhna bilimeig age cunug wawaga osol migiannu inonhigina. Eunu age odi wawaga osol mi bilecnana mahanadec eundec age hina ija sultem eunu wawaga meleigian.

²²Hina ijaca osol biluwunawe age cunug osol biluqagannu kobolkobolca bilec hina ija item eu ija age adem.

²³Ija age dunuhna biligen, hina ija dunuhna bilegan, age deweg osol bahic moqagannu adem. Eu odocna mahanadec eundec age, hina ija sultem eunuca hina ijana eundec nalunuga magana, hina ija naluni maganawe eunu wawaga fogo dugian,” don.

²⁴“O Mei! Hina ija item eu ageha ija biligina euna ija gami bileqan eunu ija gale hena. Eunu hina maha qee ifanec ninijen ija naluni memnu kobolkobol item eu age foqagan.