San Juan 17:13-24

¹³Junni Jesús yachi Apa Diosibe carocainato itsantie: —Junnasanan amana nuchica manlono joyoe tie. Nuchica camanlotuminnan, inlabe tsanque cuenta quinayoe yape labe duque son jolajosa.

¹⁴Nuchi fiquica inlachi cuwayoe. Jun tenchi nuca tennatuminla inlaca pa jolajoe. Junni ya pa junlabe lari bolon peitoyoe. Junni labe penenaminlanan, yalanan nuca tennatuminlabe bolon peitolajoe tie. Jun tenchi laca pa jominla labe penenaminlacanan pa jolajoe tie.

¹⁵Apa Diosi, nube rocainato, lachi tsachilaca tote nechi larideque rocaitiyoe; yalaca isaisari rocainayoe yape yucan yalaca feitusa.

¹⁶Lari nuca tennatuminlabe bolon peitomin jonan, inlanan la cuwenta ya tsachilabe bolon peitolajoe tie.

¹⁷Inlaca sen suwade! Nu tsarasi paca fiquibe inlachi tencaca sen suwade! tie. ¿Nuchi fiqui tsarasi paca fiqui jotun? tie.

¹⁸Nuri laca eree nuca tennatuminlachica. Junni la jun tsanquenan inlacanan nuca tennatuminlachica erechinayoe tie.

¹⁹Junni Jesús yachi Apa Diosibe carocainato itsantie: —Tencachiquenan cuwapoino joyoe tie. Inlachi tenchi cuwapoino joyoe yape inlanan nuchi cuwapoilaisa. Tsarasi paca fiquica meráto, inlari nuchi cuwapoilaichunae tie.

²⁰Nube rocainato, inlachi tenchisiri rocaitiyoe tie. Yalaca meráto labe cayaino junlachi tenchinan rocainayoe tie

²¹yape jeralela man junni jolajosa. Apa Diosi, ¿labe nube man junni jolajoyoco? tie. Junni inlanan chiquilabe man junni jonola joe tie. Tsan jonola joe yape nuca tennatuminlari quereilaisa la nu ereca jun jaca joeque.

²²Nuri laca duque sen joeque micuwae. Junni lanan inlaca tsarasi sen suwanayoe yape man junni jolajosa chiquila cuwenta.

²³Junni la inlabe man junni joichunae tie. Nunan labe man junni jochunae. Junni inla talanan jera seque man junni jonola jochunae tie yape uyanla miilaisa. Inla man junni jonari, nuca tennatuminlanan miilaichunae la nu ereca jun jaca joeque. Nuri inlaca laquirae laca cuwenta. Junni inlanan man junni jonola joe yape uyanla junca miilaisa.

²⁴Nu, Apa Diosi, inlaca labe cayaisa carica joe tie. Junni lachi inlaca labe pechularasa tenjae tie. To caitosanan, nu laca laquirato, tsaracari mantá tan chusa carie. Junni inlaca labe pechularasa tenjae yape uraran mantá tan chuminca pequiralaquisa.