Huan 17:13-24

¹³“Magaan a ro og-uli dio to koykow. Nigparinog ku sikandan oyow songo ogkarago ka soin no mgo nigtuu no waro kulang no ogkounawa ian koddi no dakol so igkarago ku.

¹⁴Nignangonan kud sikandan to innangon nu di nasundug sikandan to mgo waro nigtuu to warad paginlabot to soin no kalibutan. Ogkounawa ian koddi, kona a ogpaginlabot to soin no kalibutan.

¹⁵Kona a ogbuyu to og-awoon nu sikandan to soin no kalibutan. Ian ku ro ogbuyuon to ogbantayan nu sikandan oyow kono ogkaroog ni Satanas.

¹⁶Songo unawa sikandan koddi; warad labot dan to kalibutan.

¹⁷Pinabayo to kagi nu no ian malogot, indani nu sikandan to ogtuman to koykow no goinawa.

¹⁸Ogsuguon ku sikandan dio to mgo waro nigtuu kai to soin no kalibutan no unawa ian to nigsugu a nud kai to soin no kalibutan.

¹⁹Tongod to soini, igbogoy ku rio to koykow ka koddi no goinawa oyow ogtuman lagboy to koykow no goinawa sikandan.

²⁰Kono no sikandan do ka og-ampuan ku. Og-ampuan ku rod ka sikan no mgo otow no ogtuu pad uromo ko ogdinogon dan ka nangnangonon dan.

²¹Og-ampuan ku sikandan tibo oyow ko ogtuu on sikandan, ogkasagboka ro so lawa ran. Ka goinawa ku to sikandan woy sikanta, Amo, salupungan kinow no ogkounawa to kanta, salupungan kid. Sikan ka goinawa ku to salupungan sikandan oyow ogtuu ka mgo waro pad nigtuu to nigsugu a nud.

²²Nigbogayan kud sikandan to unawa no katondanan to imbogoy nud koddi oyow ogkasalupung do sikandan su unawa koykow woy koddi, nasalupung ki ro.

²³Duon a dio to kandan, woy sikoykow, duon ka kai to koddi oyow ogkasagboka lagboy sikandan to goinawa ran. Sikan oyow ogkataga ka mgo waro nigtuu to nigsugu a nu woy duon goinawa nu kandan no un-unawa ka goinawa nu dii to koddi.

²⁴“Amo, ogkoiniatan ku to uromo no oghondio to koykow ka mgo ogtuu no insalig nud koddi. Ka koiniatan ku oyow ogkitoon dan ka karayawi ku no imbogoy nud koddi su dakol man ka goinawa nu koddi to waro pad ka soin no kalibutan.”