1Mekehizuhizu is Samaria, he henduen be te kuruna he vulak, he ibpegalbu te menge lelenguten he menge pengulu te Israel. Heini he inged diyà mekepelastar te uuzaran he suǥud, piru egkaawà is kekempet din iring te vulak he egkeǥangu.
2Pemineg kew! Duen melig-en wey mekeǥeǥehem he nasyun he id-andam te Nengazen he ibpezezaat din te Samaria. Iring heini te ebpekezezaat he vagyu he egkelepikan te ǥiyew, wey iring te mevendes he zalem.
3Edtekutakan is Samaria, he henduen be te kuruna he vulak, he ibpegalbu te menge lelenguten he menge pengulu te Israel.
4Heini he inged diyà mekepelastar te uuzaran he suǥud, piru egkaawà is kekempet din iring te vulak he egkeǥangu. Segugunà heini egkezeeti. Iring te egkehuna egkelutui he menge beǥas te higus he edrupuen te ebpekaahà duen su egkeenen din.
5Dutun he timpu, is Nengazen he Mekeǥeǥehem, egkehimu he iring te mekempet he kuruna he vulak te nesamà he menge etew zin.
6Ebeǥayan din is menge zatù te tinguhà te layun kebeǥey te hustu he kukuman. Wey ebeǥayan din te kevurut is menge sundaru he ebantey su wey kenà ebpekeseled is menge edsurung diyà te inged.
7Piru ǥuntaan ebpemekeziregdireg te kegkelangut is menge memumuhat wey menge ebpeneuven he kenè en hustu is isip dan. Kenà egkesavut te menge ebpeneuven is ibpelewasan kandan, ne egkengesayep is menge memumuhat emun edhukum dan.
8Neketambù is utè dan diyà te lemisahan dan, ne wazè en dutun lugar he wazà meremeriki.
9Ne edriklamu zan pa mehitenged kediey he ke sikandan te: “Hengkey ves is ked-isipa zin kenitew, menge vatà he sikan pa lutasa? Maan is binatà is kebpenurua zin kenitew?
10Emun ebpenurù sikandin utew zin en ebpurpurungi te ebpesavut is ibpenurù din.”
11Ne ǥeina te kenà sikandan ebpemineg, ebpekidlalag is Nengazen kandan pinaaǥi te kegemita zin te menge lumelengyawà he selakew en is kandan he kineǥiyan.
12Iyan heini egkeǥiyen din: “Deyzey ke ebpekaangken kew te egkehimelayan niw ziyà te tanè niw. Piru kenè kew egkesuat he ebpemineg kediey.”
13Umbe, ebpenuruen sikandan te Nengazen ne ebpurungan din sikandan ebpenurùa. Ne nasì en sikandan ebpemekeurambak, egkengepelian, egkengelitag, wey egkengezekepan.
14Umbe, sikiyu is memesudì he menge edumala kayi te menge etew ziyà te Jerusalem, pemineǥa niw is Nengazen.
15Su ibpehambug niw is kegkaǥi niw te, “Nekidsebutè key te kemetayen he kenè key zin kevuta, wey nekid-uyun key te iveyaan he kenè key zin ipehendiyà. Umbe kenè key egkekeizan minsan ebpekeuma is bangkit he iring te zalem, su midsarig key te menge ketetarù wey mid-endilung key ziyà te menge limbung.”
16Umbe, iyan heini egkeǥiyen te Nengazen he MEGBEVAYÀ: “Pemineg kew! Idsavuk ku ziyà te Zion is batu he pundasyun; batu he egkeseriǥan, melig-en wey mevali. Is midtuu kandin ne kenà meǥègaanen te menge ebeelan dan.
17Edhimuwen ku he sukud is hustu he kukuman ne edhimuwen ku he tuntun is ketazeng. Ibpelayap ku te vagyu wey ed-enuzen ku te zalem is kedtarùtarù he edseriǥan niw he iyan egkeendilungan niw.
18Kenà ebpulus is kebpekidsebutè niw te kemetayen, wey is kebpekid-uyun niw te iveyaan. Su emun ebpekeuma is bangkit he iring te zalem, ne egkezeetan kew.
19Layun heini ebpekeuma su kada andew, meselem wey mezukilem, ne edezaat heini keniyu.” Egkahandek kew emun egkesavut niw heini he menge lalag.
20Su egkeiring kew te etew he edhizeǥà he kenà ebpekepengengeteng su mevavà is katri wey zeisey is malung din.
21Siguradu he edsurung is Nengazen iring te mibeelan din diyà te Buntud he Perazim wey ziyà te Suǥud te Gibeon. Edhimuwen din is kezeetan he kunaan te menge etew zin ke kenà egkehitavù.
22Umbe, kenè kew en medwalìwalì, su kela ke ibpeiseg din pa is idsilut din keniyu. Su nezineg ku he impesavut te Nengazen he MEGBEVAYÀ he Mekeǥeǥehem he edezeetan din is tivuuk he tanà.
23Purungi niw pemineǥa is egkeǥiyen ku.
24Edsigudu zè be ed-eradu is ebasuk, ne kenè en ebpemula?
25Kenè be emun egkaandam en is tanà he vevesukè din, ed-ezekan din heini te menge venì he nekedseselekawà para te kada pemuleey kayi, iring te menge penaket, trigu, barli, wey zuma pa?
26Ebpenuruen te Megbevayà is ebasuk te hustu he ebeelan umbe egketuenan din ke hengkey is ereg he ebeelan.
27Kenè din edliǥisen te ligid te kerumata zin is rinaǥun he menge penaket para meǥunas heini, kekenà, ebpenlempesan din dà heini.
28Is trigu he ebeelan he supas, melemu egkerupet. Umbe kenè din heini edsiguduwan te egunas. Kerumata is igunas din kayi, piru ebpekeventayan din he kenà heini egkengerupet.
29Heini he ketau ebpuun diyà te Nengazen he Mekeǥeǥehem. Utew meupiya is sambag din wey utew egkein-inuwi is ketau zin.
