1Kote tataru nia Zihova se Zekopi; kote vizata pule ia Sa se Izireli, meke la va koa pule i koasa dia pepeso. Sari tie karovodi si kote la somana koa rini, meke koa keke turaṉi sari pa tutina e Zekopi.
2Soku butubutu kote tokani pude turaṉa pule lani sari tie Izireli pa dia popoa. Meke sari votiki butubutu si kote nabulu la koari na tie Izireli, pa pepeso te Zihova. Sarini pu raovo vagia se Izireli si kote ta raovo vagi, meke kote baṉara ni ri na tie Izireli sarini pu ṉoṉovala i.
3Koasa rane pu harupu gamu e Zihova pa tinasigiti, tinalotaṉa, meke minatagutu,
4si kote va sisire nia gamu sa baṉara pa Babiloni meke zama: “Sa tie ṉoṉovala si ele beto! Sa tinavete kaleana sapu huruṉuna tanisa si beto!
5E Zihova ele moku pania sa kolu ṉiniraṉira tadi na tie kaleadi, sa kolu pinalabatu tadi na baṉara,
6sapu pa tinaṉaziri si ele seke gore tie sapu loke vinabetona, meke pa binugoro si ele huari sari na butubutu meke ṉoṉovala va kaleana.
7Kamahire si magogoso sa kasia popoa pa binule; meke podalae kerakera.
8Sari huda sida meke huda paeni pa Lebanoni ba qetu meke zama, ‘Kamahire sapu hoqa gore si agoi, si loke tie mamaho huda kote mae maho goreni gami.’
9Sa lovu si ele va namanama pude va kamo igo pa mua inene la; va vaṉuni sa sari na maqomaqo vasina pude va kamo igo, doduru ari kasa koimata pa kasia popoa pu ele mate; va tekuli sa koari na dia habohabotuana baṉara, sari doduru baṉara koari na butubutu pu koa pa lovu kamahire.
10Kote olaṉa sari doduru, kote zama si arini koa goi, ‘Agoi si ele malohoro gua mo gami; ele gua mo gami si agoi.’
11Doduru vina lavatamu si ele gore beto la pa lovu, turaṉae koari na vevehedi ri na mike; na uloso si ele ivara pa kaurumu meke na uloso kote nobi igo.
12Nomana sa hinoqa gore tamugoi pa Maṉauru, agoi na pinopino habia, tuna koreo sa vaqavaqasa! Ele ta gona gore la pa pepeso si agoi, agoi pu ele va goredi pa pepeso sari na butubutu!
13Zama si agoi pa bulomu, ‘Kote sage la pa Maṉauru si arau; kote va ululu ia rau sa qua habohabotuana baṉara holani sari na pinopino te Tamasa; kote habotu tava baṉara si rau pa kenudia rina vinarigara tamasa, koasa toqere hopena sapu ululuna hola.
14Kote sage ululu holani rau sari batudi rina lei; kote guni pule nau sa Tamasa Ululuna Hola.’
15Ba ta vagi gore la pa lovu si agoi, la pa pou sapu lohi hola.
16Sarini pu dogorigo si doṉo toto sisigiti igo rini, meke nanasa: ‘Asa tugo sa tie pu niu ia sa popoa pepeso meke va matagutu neneqarai sari na butubutu?
17Asa tugo sa tie sapu iliri nia qega sa kasia popoa, pu huara goreni sari vasileana lavata meke lopu va malumi sari pu ta raovo vagidi pude pule pa dia popoa?’
18Doduru baṉara matedi koari na butubutu si eko noso, hopeke koa pa dia lovu tolavaedi.
19Ba agoi si ta gona vura pa mua lovu guana keke lelaṉa ta kiluna; opo tamunu igo rina tie ta seke va matedi, koari na tie ta hova va matedi, koarini pu tava gore la koari na patu pa pou. Tava neti gore pa nene si agoi,
20ke lopu ta pomunu va leana si agoi, sina huaria goi sa mua popoa soti, meke va matei goi sari turaṉamu. Sari tuti dia ri na tie kaleadi gugua arini si lopu hoke ta avoso pule.
21Va nama ia si keke vasina pude va matei sari tuna koreo koasa sinea tanisa tamadia; lopu kaqu baṉara nia rini sa kasia popoa babe va sokui sari dia vasileana lavata koasa pepeso.”
22Zama se Zihova Tadi na Qeto Minate, “Kaqu raza i Rau si arini. Kaqu seke pania Rau koe Babiloni sa pozana meke sarini pu koa vasina, sari tuna meke tutina,” gua se Zihova.
23“Kote iliria Rau pude na vasina tadi na duduru meke kote tale zemizemina; kote sara nia sasarana tinahuara Rau,” gua se Zihova Tadi na Qeto Minate.
24Se Zihova Tadi na Qeto Minate si va tokotokoro, “Hinokara, gua sapu ele balabala ia Rau, asa tugo si kaqu gorevura, meke gua sapu hiva tavetia Rau, asa si kaqu ta evaṉa.
25Kaqu va kilasi Rau sari na tie Asiria pa Qua pepeso pa Izireli; koari na Qua toqere kote neti gore ni Rau. Kote vagi pania Rau sa ioki te Asiria koari Qua tinoni, meke sari nana pinaleke mamata si kote va rizui Rau pa avara dia,” gua.
26Sa Nana hiniva asa si tana doduruna sa kasia popoa; sa Limana si ele nadoro vura pude va kilasi sari na butubutu.
27Ura se Zihova Tadi na Qeto Minate si ele zama, ke esei kote boka va kari ia? Sa Limana si ele nadoro vura, ke esei boka va noso ia?
28Inavoso hie si kamo pa vuaheni sapu mate sa baṉara Ehazi:
29Mi lopu koa qetuqetu, gamu doduru pa Pilisitia, sina moku sa kolu tanisa baṉara sapu ta seke nia gamu; ura koasa karosona sa noki matena asa si kote vura mae si keke noki variva mate, pude va mate gamu!
30Saripu malaṉa sisigiti si kote poni Rau gua rina Qua sipi, meke kote koa va bulebulei dia. Ba sapu gamu pa Pilisitia si kaqu huara pani gamu Rau pa soṉe; lopu keke si kote toa hola.
31Kabo gamu pa sasada! Gagaemana gamu pa vasileana nomana! Mi holoqoru, gamu doduru pa Pilisitia! Ta dogoro pa seu sari tuṉahadi rina vasileana ta suludi. Na qeto minate ṉiṉirana si mae gua pa kali gede. Tale tie varane si arini, bebeno mae, na variva mate hola.
32Na sa sa inolaṉa kaqu poni ni gita saripu paleke inavoso tadi pa Pilisitia? “E Zihova si ele kuria sa popoa Zaione, meke vasina si kaqu tava sare sari Nana tinoni pu ele tava ṉoṉovala.”
