1Ikanta Tajorentsi ineshironkateeri Jacob-iite. Riyoshiiteeri Israel-paeni, roepiyeeri rashiteeyaawo iipatsite. Ipokaki paashinijatzi, itsipateeyaari inampiki Jacob-iite.
2Raakameethateeri paashinijatziite irikaete Israel-paeni, ramitakoteeri ipiyayitee inampiki. Imateero Israel-paeni, romperataari shirampariite eejatzi tsinaniite. Ikaatzira omperawaetakariri paerani Rirori, ipiyataari rirori, rompera-tanewo rowaeri.
3Arika rowatsinaaryaakotaami Tajorentsi pikemaantsiwaetakaha, powashiretakowaetaha, rashiminthateetzimira romperaetzimi,
4aritaki pithaenkaeri pinkatharitatsiri Babilonia-ki, pikante pomampaeya: “¡Pamineri irika! ¿Jempe okinakika romperawaetakae paerani? ¡jempe ikantakiroka ithonkantakawori nampitsi ijeekira ooro!
5Itzinkahapithateeri Tajorentsi ipajamento irika kaariperori, rootaki rotaeyapiintziri pinkathari,
6rootaki ipajawaetantakariri atziriite, tema antawoete ikijaka, rootaki ipinkantakariri nampitawori jemperikapaeni, tema antawoete amashirenkari okantaka.
7Kameethari ijeekaetee maawoeniki kepatsi, tekatsi koshekawakahaachani. Kimoshireri ikanteeya ikaemawaeteeyeni.
8Eekiro othaamentatya inchatopaeni jeekatsiri Líbano-ki, kimiwaetaka okenkithawaetatyeemi santari, Okante: “Tema rashiryahaetakimi eeroka, tekatsi pokatsini itowaena naaka.”
9Antawoete ikoshekawaka kaminkaripaeni otapinaki, pokaki otonkyotawaemi. Kakintetaki ishire kaminkariite, ikaatzi jewatatsiri paerani kepatsiki pokaki otonkyotawaemi. Ikaatzi pinkathariwentziriri paerani atziriite tee ijeekae nimaeka iwinkatharimentoki.
10Maawoeni iñaawaeyitee, ikantawakahaeya: ‘Pimatzitawoma eeroka tee otzimimoteemi pishintsinkari, poshiyakotaanawo naakaete.’
11Jempe okineeroka pishamenkari, eejatzi oyameninkari piwiyompimento. Shitziinka okantaka pimaantari, chowiyitaki eejatzi pipashikawo.
12¡Eeroka iiteetaweetari Sariwoto! jempe iitaka rowaryahaetantakimiri. Osheki atziriite pipinkathariwentaki, roori kantzimaetacha rowaryahitakimi jaawi.
13Pikantashirewitaka: “Nateete jenoki jenokintaki, Nowetsike nowinkatharipankote nawijanakiri ompokiropaeni ijeekira Tajorentsi. Ari nojeekeri janta katonkonta, ochempiki ipiyotapiintaha itajorentsitetashiitari.
14Niyaaperote jenoki nawijanakiro ojenokitzira menkori, Noshiyaari Jenokijatzi.”
15¡Tema piyaatashitaka inthomoeperotzira ipinkathariwenteetzirira kaminkaripaeni!
16Pampoyaa royemi ikaate ñeemini, Antawoete raminaminthetemi, ikante: ‘¿Riima irika atziri ithaawakaani kepatsijatzi, thonkirori nampitsipaeni?
17Riitaki owaankiityaakirori kepatsi tekatsi nampiteeyaawoni, ithonkakiro maawoeni nampitsi. Tee ishineteeri ijeekashiwaeteeyani ikaatzi raayitakiri.’
18Kamayitaki maawoeni pinkathariwentakiriri paashinijatziite jempe ikitayitaka, apaanipaeni ikitataka riroriite.
19Rooma eeroka, rookaetakimi inteena kitataarewomashiki, Roshiyakahaetakimi shitzitatsiri kaarashi, Roshiyakahaetakimi eejatzi shitziwari, arika rompojawakahaeyani atziri, rookaetakiri impeetaki opiyotaha mapi.
20Eero roshiyakahaetzimiri itsipa pinkathariyitatsiri ikaatzi ikitaetakiri, tema pimaperotakiro pinampiite, pompojaki pisheninkapaeni pinampiki. Eero ikijotzi rañe isheninkapaeni kaariperori.
21Powetsikya okine pompojeri itomipaeni, okantakaantziro rompojantzira ipaapate, Eero ikenkithashirewaetantaawo ipinkathariwenteeri nampitawori kepatsiki, eero ishenitantaawo nampitantyaawoni kepatsiki.
22Iroka ikantaki Tajorentsi shintsiperori: “Nokoshekatyeeyaari irikaete, nothonkaeri Babilonia-jatzi, ikaatzira jeekatsiri janta, rowaeyaniite eejatzi ichariniite.
