Duku 1:46-79

⁴⁶Kɛ̀ Mɑɑrii dentɛ̀ kɛ dɔ̀: N wɛ̃nnì sɑ̃ntímu n Yiɛ̀,

⁴⁷kɛ̀ n yɛ̀mmɛ̀ nɑɑtinɛ̀ Kuyie kunku n dɛɛtíwè.

⁴⁸Kɛ yɛ̃́ kù n wèńtɛ́mɛ̀ fɛnɔnsɑ̀ɑ̀fɛ̀, mí nku kóo tɔ̃ntì sɑ́m̀pɔ́ù, kɛ̀ bɛ̀ bo nni nyu sɑ̃́ɑ̃̀ kɛ tú diwɛ̀ì yiɛ̀.

⁴⁹Kɛ yɛ̃́ Muwɛ̃rímú mumɔu yiɛ̀ nni ndɔ̀ɔ̀mɛ̀ dɛ̀mɑrɛ̀ diɛrɛ̀, wenwe wèè yètìrì tú kpɑ mɛyɛi,

⁵⁰kòò kuɔ̀ mmɛsémmɛ̀ sɑ̃́ɑ̃̀ bɛ̀ɛ̀ ò dé,

⁵¹kɛ yòutɛ o bɑkù nɛ̀ muwɛ̃rímú kɛ̀ sifeí yɛmbɛ̀ cìɛ́tɛ́,

⁵²kɛ buɔ́ mbɛkpɑ̀ɑ̀tìbɛ̀ kɛ íi mbɛcĩ̀rìbɛ̀,

⁵³kɛ píɛ ntikpɑ̀tì dikònnì bo bɛ̀, kɛ bɛ̀ti tikpɑ̀tì yɛmbɛ̀ bɛ nɔu sinùmmù,

⁵⁴kɛ kuɔ́ mmɛsémmɛ̀ ku kó bɛtɔ̃mbɛ̀ Isidɑyɛɛribɛ, kɛ bɛ̀ teennɛ̀,

⁵⁵kɛ́ndònnɛ̀ kù do tì nɑ̀kɛ́mɛ̀ ti cicɛbɛ̀ nɛ̀ Abɑrɑhɑmmu kó diyuu ĩ́nkɛ̀ nɛ̀ o yɑɑ̀bío sɑ̃́ɑ̃̀.

⁵⁶Mɑɑri do bo mbonɛ̀ Edisɑbɛti kɛ dɔ̀ bɛtɑ̃̀ɑ̃̀bɛ̀ bɛ̀tɑ̃ɑ̃ti ndi kɛ́wɛ̃tɛ kɛ́kò nho ciɛ.

⁵⁷Kɛ̀ Edisɑbɛti pɛitɛ́mɔ̀nnìi tuɔkɛ kòo pɛitɛ́ dɛnitidɑbirɛ.

⁵⁸Edisɑbɛti pɛɛtitɔbɛ̀ nɛ̀ o nɑɑ̀mùnkù kɔbɛ kɛ̀ bɛ̀ɛ keè ti Yiɛ̀ nKuyie nhò dɔ̀ɔ̀ mɛ̀ɛ̀ sɑ̀ɑ̀ nkóò wɛ̃nnɛ́nɛ̀ kɛ̀ bɛ̀ nyɑ̃nku.

⁵⁹Dɛbirɛ yiè niínnì yiè kɛ̀ bɛ̀ɛ kɔtɛní kɛ bo dɛ̀ cɑ̃ntɛ́, kɛ́ndɔ́ kɛ́ dɛ̀ yu kɛ dɔ̀ Sɑkɑrii, dɛ cicɛ yètìrì.

⁶⁰Kòo yɔ̃ yetɛ kɛ dɔ̀: Dɛbirɛ yètìrì yó ntú Isɑ̃ɑ̃ nwe.

⁶¹Kɛ̀ bɛ̀ɛ yetɛ kɛ dɔ̀: Òmɔù í bo di nɑɑ̀mùnkù miɛkɛ wèè mɔ̀kɛ dɛ kó diyètìrì.

⁶²Kɛ̀ bɛ̀ɛ bekɛ Sɑkɑrii nɛ̀ tɛnɔ̀ùtɛ̀ kɛ bo yɑ̀ ò dɔ́ o birɛ yètìrì yó ntú mù.

⁶³Kɛ̀ Sɑkɑrii bekɛ tɛdɑbɛɛtɛ̀ kɛ́wɑ̃ri kɛ dɔ̀: O yètìrì yó ntú Isɑ̃ɑ̃ nwe. Kɛ̀ dɛ̀ɛ bɛ̀ di bɛmɔu.

⁶⁴Kòo nɔ́ndɛnfɛ̀ pɑ̃̀nkɛɛ dɑtɛ kòo nɑ kɛ́bɛ́i nkɛ́sɑ̃ntɛ Kuyie.

⁶⁵Kɛ̀ kufɔ̃wɑɑ́ mpĩ́ nho cɛ̃pɛɛtitɔbɛ̀ bɛmɔu, kɛ̀ dɛ kó tinɑ́ɑǹtìi pitɛ́, kɛ́tuɔkɛnɛ̀ yɛhɛkɛ̀ yɛ̀ɛ̀ bo Sudee kó yɛtɑ̃rɛ̀ ĩ́nkɛ̀.

⁶⁶Bɛ̀ɛ̀ kó dimɑ̀ɑ̀ tì kèè kɛ̀ bɛ̀ mbékú bɛmɑ́ɑ̀ kɛ tú: Dɛ kó dɛbirɛ sɑ̀ɑ̀ yó ntú we? Kuyie nkó muwɛ̃rímú muù do ò bonɛ̀.

⁶⁷Kɛ̀ Muyɑɑ́nsɑ̀ɑ̀mùu píɛ nSɑkɑrii, dɛbirɛ cicɛ kòo nɑ́kɛ́ Kuyie mpɑ̃ɑ̃nɑ́ɑǹtì kɛ dɔ̀:

⁶⁸Ti Yiɛ̀ nKuyie tínti Isidɑyɛɛribɛ tũ nkù, n dɑ sɑ̃ntímu. Fɔ̃́ nwèè teennɛ̀ ɑ nìtìbɛ̀ kɛ bɛ̀ dɛɛtɛ́,

⁶⁹kɛ duɔnní Odɛɛtíwè diɛwè ɑ kóo tɔ̃ntì Dɑfiti kó kufuku miɛkɛ,

⁷⁰ɑ pɑ̃ɑ̃nɑ́ɑǹtì nɑ́ɑm̀bɛ̀ do ti nɑ̀kɛ́mu nɛ̀ dimɔ̀nnì,

⁷¹ɑ yóó duɔnnímɛ̀ Odɛɛtíwè, kòo ti dɛɛtɛ́nɛ̀ ti kpɑntídɛ̀ntɔbɛ̀, kɛ ti pɑtɛnɛ̀ bɛ̀ɛ̀ ti níí.

⁷²A dèntɛnímu ɑ kó mɛtɑummɛ̀ sɑ̀ɑ̀mɛ̀ kpɛ́í, kɛ kuɔ́ nti cicɛbɛ̀ mɛsémmɛ̀.

⁷³A do nɑ̀kɛ́ tìnti ti yɑ̀ɑ̀rì Abɑrɑhɑmmu kɛ dɔ̀:

⁷⁴A bo ti dɛɛtɛ́nɛ̀ ti kpɑntídɛ̀ntɔbɛ̀, kɛ̀ ti nɑ kɛ́mpĩ́ nhɑ tɔ̃mmú kɛ bɑ́ nyĩɛ̃̀kù,

⁷⁵kɛ́ndò mpɑ́íí ɑ ììkɛ̀, kɛ dɔɔri ɑ dɔ́mɛ̀ ti fòmmu mumɔu miɛkɛ.

⁷⁶Fɔ̃́ m birɛ, bɛ̀ bo ndɑ yu kɛ tú Oĩ́nkɛ̀nkpɑ̀ɑ̀tì kó tipɑ̃ɑ̃nɑ́ɑǹtì nɑ́ɑǹtò, kɛ yɛ̃́ fɔ̃́ɔ̃̀ yóó niitɛ́mɛ̀ kɛ́tũntɛ ti Yiɛ̀ ncɛ,

⁷⁷kɛ́bɛnkɛ bɛnìtìbɛ̀ ti Yiɛ̀ nyóó bɛ̀ dɛɛtɛ́mɛ̀, kɛ́ bɛ̀ cĩ̀ɛ̃́ mbɛ yɛi.

⁷⁸Nɛ̀ Kuyie nkó mɛsémmɛ̀ diɛmɛ̀ kpɛ́í nkɛ, kù ti duɔnnímɛ̀ kɛĩ́nkɛ̀ kó kuwenniku,

⁷⁹kɛ̀ kù bo míítɛ́ bɛ̀ɛ̀ bo mukṹṹ nkó dibiìnnì miɛkɛ, kɛ ti tɑnnɛ́ mɛom̀pùmɛ̀ kó kucɛ.