Lucas 1:46-79

⁴⁶Kahin Maria to, “Od doongon ku en kos Monama nod Longaggon diyot tivuk no pusung ku!

⁴⁷Woy oray'd kahaa kos ginawa ku taddot Monama no Tohodtobbus ku.

⁴⁸Oyyos waa a en nikandin lingawi, ahad moobbava a ra no sudsuhuwon din. Pomon ko‑ungkay, od osengon to langun no minuvu no moppiya kod kotomanan ku.

⁴⁹Oyya su Motuus kos Monama woy mokososoobbu kos id puungan din koddi. Motallong sikandin woy uhis kos ngaran din.

⁵⁰Pomon poron to unnon linubbaran taman ko‑ungkay woy taman to waad tomanon, eeruwon sikandin to langun no minuvu no duwon allak kandin.

⁵¹Id pokita rin kos kandin no kotuusan ukit to pinuungan din. Id podsuwoysuwoy rin iddos mgo minuvu nod poratasdatas woy'd pobporoong.

⁵²Id pa‑awa rin iddos mgo hari riyot kodponguu ran, woy od porotason din iddos od poobbava.

⁵³Id ivuung din iddos id ponggutasan to kopiyannan, piru id pa‑awa rin iddos pongkoruwonnan no waa en nopiyod.

⁵⁴Id tovangan ki nikandin no koubbaran ni Israel no uripon din, woy dii en sikandin od kolingow taddot tandu rin nod ko‑eruwan keta.

⁵⁵Oyya su id tandu rin no id ko‑eru‑i rin si Abraham woy dos koubbaran din taman to waad tomanon.”

⁵⁶Na, id oubpa pa si Maria riyot ongki Elisabet daom to mgo otollun buwan woy nopongnga, id uli ron sikandin.

⁵⁷To id inguma ron kos timpu nod pototobbow ron si Elisabet, id aanak sikandin to mama.

⁵⁸Na, norinog taddot mgo sumbaoy woy korumannan onni Elisabet no dakkoo kos eru to Monama kandin, woy nahaa sikandan duma kandin.

⁵⁹To wau ron no allow iddos anak pomon to kodtobbow, id lolivuung sikandan amoy'd tupuwan dos anak. Na, id posangoy ran nanoy iddos anak ki Zacarias no amoy rin.

⁶⁰Piru mid ikahi si Elisabet to, “Konnod kopakoy! Juan kos id ngaran kandin.”

⁶¹Kahi ran ki Elisabet to, “Mambo man? Waa man moho ahad sokkad no korumannan dow no id ngoranan to Juan.”

⁶²Na, id sinyasan dan iddos amoy ko ondan kos id kopi‑i rin no id ngaran taddot anak.

⁶³Id sinyas sikandin no od boggayan to popii amoy'd sulatan, woy id sulat sikandin no mid ungketen to, “Juan kos ngaran din.” De‑en nosoobbuwan sikandan langun.

⁶⁴Na idda ron en, noko‑ooseng don sikandin woy id doong din kos Monama.

⁶⁵Nosoobbuwan iddos langun no sumbaoy ran pomon to ponudtulon moka‑atag taddon notomanan, woy nokoso‑ob idda riyot mgo minuvu no id pon‑ubpa riyot buvunganon no sakup to Judea.

⁶⁶Na iddos langun no minuvu no nokorinog tadda, id popoomdom woy id po‑inturoy. Kahi ran to, “Ondan ayu kod ingumannon ka‑ay'n anak otid dakkoo ron sikandin? Oyyos od kokita man, no riyon en to kandin iddos kotuusan to Monama.”

⁶⁷Na si Zacarias no amoy taddot anak, no‑iroomman to Uhis no Ispiritu, woy id oseng din iddos id poposaddoo kandin to Monama. Kahi rin to,

⁶⁸“Od doongon ta iddos od Longaggon no Monama to koubbaran ni Israel, su id undini sikandin amoy'd tobbus to mgo minuvu rin.

⁶⁹Id po‑undini rin iddos Tohodtobbus no motuus no id pomon to koubbaran ni Harin David no sudsuhuwon din.

⁷⁰Ini en mandad kos id ikahi rin dangan ukit taddot mgo propeta no id aam din.

⁷¹Id tandu sikandin no od polegguangon ki nikandin pomon diyot bollad tod pongkuntra keta woy pomon diyot langun nod kolingasa keta.

⁷²Id ikahi mandad sikandin no id ko‑eru‑i rin iddos kovuyyahan ta, woy dii rin od lingawan iddos uhis no kodpotonduwoy rin kandan.

⁷³Su ini en kos kodpotonduwoy no id pongulivottan din diyot ko‑opuwan ta no si Abraham,

⁷⁴no od polegguangon ki nikandin pomon diyot bollad taddot od pongkuntra keta, su amoy od pokopuung ki atag to Monama no waa id kovaakki ta.

⁷⁵Woy amoy od molinis woy'd komotallong ki riyot kod‑ontong din taman tod kovudtus kos songnga ta.

⁷⁶Na sikkow mandad no anak ku, od ngoranan ka no propeta to Monama no Lampas to Langun. Od unna ka tod Longaggon, su amoy od panoy to mgo minuvu taddot kod‑inguma rin.

⁷⁷Od nonaw ka to mgo minuvu rin no od kotobbus sikandan ukit to kodposinsya to Monama taddot mgo saa ran.

⁷⁸Oyya su iddos Monama ta, eeruwon woy mohingginawa. De‑en id popiyod din iddos Tohodtobbus pomon diyot datas to langit iling to se‑aa to lammid bottun allow.

⁷⁹Inin se‑aa, od boggoy to ko‑owangan to mgo minuvu no riyot mosukirom woy dos novaakkan to kopotayan. Id potuntuu ki nikandin no od pokod‑uli kos koroniyan ta riyot Monama woy riyon to duma.”